amalinks wokungena

Mugabe: Kangilamvumo Yokukhetha Ongangena Esikhundleni Sami

  • Gibbs Dube

UMongameli Robert Mugabe lemmuli yakhe emkhosini wokunanza ilanga lakhe lokuzalwa eMatopo Junior School, Matabeleland South province.

UMongameli Robert Mugabe uthi angeke akhethe umuntu ozangena esikhundleni sakhe.

Ekhuluma ngoMgqibelo emkhosini wokunanza ilanga lokuzalwa kwakhe eMatopo Junior School (okwakuyi Rhodes Estate Preparatory School) esabelweni seMatabeleland South, uMugabe uthe ibandla leZanu PF lilesisekelo sombuso esingamvumeli ukuthi akhethe ongangena esikhundleni sakhe.

UMugabe lemuli yakhe ...
UMugabe lemuli yakhe ...

Wethule umbiko lo, engakadli ikhekhe lakhe, esiwuthole kumabonakude wephephandaba leHerald ebulenjini balo bokuzilibazisa obe Facebook.

UMugabe uthe kungeke kwenzakale ukuthi adinge umuntu ozangena esikhundleni sakhe ngesikhathi esanda kuthi akulamuntu olamandla njalo olamaqhinga anjengawakhe ongangena esikhundleni lesi.

“Ibandla lethu lilesisekelo sombuso esibalulekileyo esitshengisa ukuthi abantu bakhethwa njani. Ngakho-ke yindaba, yindaba, abanye abantu befuna ukwephula iziqondiso zesisekelo sombuso webandla leli nxa befuna ukungena ezikhundleni. Akwenzi ukuthi uzame ukukhethuza isisekelo lesi udinga isikhundla. Kungeke kwenzakale lokhu. Akulabandla lezombusazwe elisebenza njalo. Nxa ufuna isikhundla kumele ukhethwe ngabantu … Akukhethile ukuthi ufuna isikhundla sokuba ngumgcinisihlalo wasiphi isigaba.

Abanye abantu akade besedilini likaMugabe.
Abanye abantu akade besedilini likaMugabe.

“Kuyamangalisa ukuthi abanye abantu abafuna izikhundla lezi sebebumba amaqembu ukwenzela ukuthi bathole izikhundla abazifunayo. Lokhu kungeke kuphumelele kubandla leZanu PF. Loba kanjani, kungeke kuphumelele.”

Ugcizelele esithi amaqembu asebunjwe ngabanye abalandeli bebandla lakhe alwela isikhundla sakhe.

“Abanye balamaqenjana lapha lalaphaya … Abanye bathi uMugabe katshiye isikhundla (umuntu okhulume emphakathini … Esiyangaphi?). Lami ngiyazibuza khonalokho. Akufunakali lokhu. (omunye umuntu emphakathini … kabahambe bona). Nxa ibandla le Zanu PF lingathi ngitshiye umsebenzi ngizakwenza njalo kodwa kangizake ngale ukumela abantu kusukela ngesikhathi ngingusibalukhulu webandla leli kuze kufike lamuhla ngingumongameli.

Ikhekhe elidliwe edilini likaMugabe
Ikhekhe elidliwe edilini likaMugabe

“Lokhu okukhulunywa ngabanye abantu abathi kumele ngidinge umuntu ozangena esikhundleni sami akusiyonto yokunatha utshwala … ukubiza abantu ukuthi wozani sinathe utshwala. Asikufuni lokho njalo akusoze kwenzakale. Akusoze kuphumelele. Abantu kumele bakhethe umuntu abamfunayo. Iziqondiso zesisekelo sombuso sebandla lethu zikubeka sobala konke lokhu. Mina ngilamandla okukhetha abasekeli bami hatshi ongangena esikhundleni sami. Kangila mandla okwenza lokhu. Hatshi bo!!”

Kulokuxokozela kubandla leZanu PF okubangwa khona isikhundla sikaMugabe oseleminyaka yokuzalwa engamatshumi ayisitshiyagalilunye lantathu (93).

Umkakhe, uGrace Mugabe, lomsekeli wakhe uMnu. Emmerson Mnangagwa bacabangelwa ukuba bafuna isikhundla sakhe. Bayakuphika lokhu.

Facebook Forum

XS
SM
MD
LG