amalinks wokungena

Breaking News

Mugabe: Ngisakhona Njalo Kangiguleli Ukufa


UMongameli Robert Mugabe lomkakhe, uNkosikazi Grace Mugabe.

UMongameli Robert Mugabe uthi kayindawo njalo kaguleli ukufa njengalokho okukhulunywa ngabanye abakubandla leZanu PF ababanga isikhundla sakhe.

Ekhuluma emphakathini emhlanganweni webandla leli eChinhoyi ngoMgqibele obuqoqwe luhlangothi lwabasakhulayo olwe Youth League, uMugabe uthe usakhona esikhundleni sikamongameli njalo usaqine saka.

“Kulenkulumo phakathi kwethu ethi umongameli sesuka esikhundleni. Kangiyindawo. Abanye njalo bathi umongameli usezabhubha … Kangiguleli ukufa ... Ngingaba lomkhuhlane lapha lalapha emzimbeni wami kodwa ngisaqinile … Izitho zami zomzimba zisasebenza kahle … Ziqine nko ...”

UMugabe, oleminyaka engamatshumi ayisitshiyagalo lunye lantathu (93), ukhulume amazwi la eyame ibhokisi elide ajayele ukuma khona phambili kukazulu.

Kulokuxokozela kubandla lakhe ngesikhathi esanda kuvela eSingapore lapho abedinga khona uncedo lwamadokotela. Usehambe kulelolizwe kathathu lonyaka.

Abasekeli bebandla le Zanu PF balwisana ngokuzama ukufaka umuntu ozamela ibandla leli esikhundleni sikaMugabe engatshiya umsebenzi.

Kulamacele amabili okuthiwa akhokhelwa ngumsekeli wakhe, uMnu. Emmerson Mnangagwa, lomkakhe uGrace Mugabe, abangisana isikhundla lesi.

UNkosikazi Grace Mugabe usanda kutshela abalandeli bebandla leli ukuthi uMugabe kumele avezele uzulu ozathatha isikhundla sakhe.

Facebook Forum

XS
SM
MD
LG