amalinks wokungena

Breaking News

Mwonzora:Ngijonge Ukumanyanisa iMDC Ukuze Ibuyele Kusimo Sika2014


Osanda kukhethwa ukuba ngumkhokheli weMDC-T, umnumzana Douglas Mwonzora

Osanda kukhethwa ukuba ngumkhokheli weMDC-T umnumzana Douglas Mwonzora ngoLwesibili, wethule amagama enkokheli entsha ezabi isabambe intambo egoqela unkosazana Thokozani Khupe, uEngineer Elias Mudzuri, umnumzana Morgen Komichi labanye. Lokhu kwenzakala ngesikhathi ingcwethi zesisekelo sombuso zisithi akusela kubuyela emuva kulokho okwaphuma kukhetho ngaphandle kokuba sokugenqulwe ngumthethwandaba.

Wemukelwe nganjabulo enkulu yilabo akade bezofakaza ukuthatha kukaMwonzora isikhundla sakhe sokuba ngumkhokheli omutsha weMDC-T ngemva kokunqoba kukhetho olwenziwe ngempelaviki lanxa akade encintisana labo besithi kabayamukeli impumela yalolu khetho njengoba lungaqhutshwanga kuhle besithi kube lokuqilibezela okukhulu.

UMwonzora utshele umhlangano lentathelizindaba esigodlweni seMDC-T eseHarvest House lapho abekade ezozibika ebandleni lakubalandeli bakhe, ukuthi inkokheli yebandla khona izohlala phansi ikhulumisane ngokuthi kuqhutshekelwa phambili ngayiphi indlela.

“Yena lowo owakhethwa ukuba ngumsekeli womkhokheli webandla ngomnyaka ka 2014 nguye ozakwala ekuleso sikhundla. Ngizongenisa umcabango wami kwabe National Council ukuba lapho kukhethwa umsekeli womkhokheli wesibili, kube ngu Engineer Elias Mudzuri obekwa kuleso sikhundla.”

Wengeze ethi injongo yakhe okwamanje yikumanyanisa wonke amalunga ebandla kubuyelwe esimeni sakuqala lapho ibandla le MDC kwakuyilona bandla eliphikisayo elikhulu lingacezukanga njengalokho eliyikho khona manje.

Enye ingcwethi kwezemithetho usikhwicamfundo Lovemore Madhuku encwadini yakhe ayilobele inkokheli ye MDC – T, uthe okukhona yikuba ukhetho lwenziwa njengalokho okwakunqunywe ngumthethwandaba we Supreme Court kwancintisanwa kwaba lempumela emgceke.

Okusekelwe ngomunye wabaphatheke kumikhankaso yokwazisa uzulu ngesisekelo sombuso ye #THIS CONSTITUTION unkosazana Abigail Mupambi.

“Angiboni mina ukuthi into leyi eyokuthi uMaKhuphe usuke wagijima wathatha isikhundla sakhe sayizolo esesisthi uyanalifaya uDouglas Mwonzora, iphumelela. Angatsho nje kodwa okusalayo bakithi kufuze singacabangi kumbe senze izinto ngama emotions. Nginje mina, at individual capacity angiboni sibili ukuthi uDouglas Mwonzora ngingathi bengimsapota at personal level, but lapha sesidinga ukuthi sizwisise ukuthi ukhetho, kanti ku democracy kuhamba njani, ukhona oluzayo, ukhona owinayo.”

Kodwa uMwonzora uhle waphanga wasola abenze udlakela oluqondiswe kuMaKhuphe emveni kokukhalala kwakhe umhlangano wokhetho lolu obusehoteleni eye HICC eHarare.

“Asilufuni udlakela kulelibandla thina. Kuyasidanisa ukuzwa kuthiwa sekusetshenziswa amanye amagama angalunga aseqondiswe kuMaKhuphe, asiwelelani lakho lokho thina. Ubukhokheli bami kabuyi kuvumela inzondano, asifuni ukukhethana ngokuthi umuntu ungumama loba ubaba, umhlobo kanye lokuthi uvela kusiphi isigaba layiloba yiphi indlela engasetshenziswa kulokho.”

Kodwa isikhulumeli secele leMDC-T elisekela uMaKhuphe, umnumzana Khaliphani Phugeni uthi luyethusa udlakela olube khona ngesikhathi sokhetho.

“Into esiyibonileyo sonke ngeSonto, itshaqisa umzimba, asingeke siyithande, asingeke siyifise. Angicabangi ukuthi nxa kukhethwa uPresident welizwe, ungavuma ukuthi akhethwe ngendlela enjalo ubususithi hayi nguPresident, ukhethwe kahle, sijabulile.”

Kwasekelwa ngesinye isakhamuzi sedolobheni leHarare umnumzana Tafadzwa Chigandiwa.

“Isehlakalo sokutshaywa kukamama uMaKhuphe kuCongress, yisehlakalo esidabukisayo kakhulu, esitshengisela ukuthi khona thina njengamaZimbababweans, asila nhlonipho esiyinikanayo. Ngoba thina siyabe sikhangelele kibo laba amapoliticians ethu abanje ngoMaKhuphe labo Komichi bona labo laboMwonzora. Kodwa nxa bekwanisa ukusitshengisela ukuthi bona bayakwanisa ukuyenzana njalo, phambi kwamehlo abantu, kutshengisela ukuthi hayi, akula nto ephumayo. Akula khangelelo esingaba lalo thina njengamaZimbabweans ukuthi siyakwanisa ukuguqula ilizwe lethu.”

U Mwonzora ugcizelele ukuba akula nkokheli ezosuswa esikhundleni akhethwa kiso ngesikhathi kuqhutshwa umhlangano weCongress ngomnyaka ka 2014 ngaphandle kokuba isizisusa yodwa ngokuthanda kwayo.

Bebekhona abasekeli balelibandla abalezikhundla ezitsheyeneyo njalo bebetshengisa usekelo lwabo ngengoma ephakamisa uMwonzora njengomkhokheli wabo.

Facebook Forum

XS
SM
MD
LG