Inhlanganiso emela abathengi, iNational Concumer Rights Association (NACORA), ithi intengo yezinto ilokhe ingakayehli lanxa uhulumende ethusele ukubopha asomabhizimusi abakhuphule imbhadalo besebenzisa umkambo wensitha.
Uhulumende uthi amabhizimusi kumele athengise izinto zawo esebenzisa isilingaliso sokuthengiswa kwedola leMelika asihlelileyo esithi idola elilodwa kumele lithengwe ngamadola eZimbabwe ayisitshiyagalolunye, 1:90.
Iziphathamandla zebhanga elikhulu lelizwe eleReserve Bank of Zimbabwe (RBZ) zihlangane lenhlanganiso zabosomabhizimusi ekuqaleni kweviki bavumelana ukuthi akumelanga bakhweze intengo belawulwa ngumkambo wensitha wona othengisa idola leMelika elilodwa ngamadola eZimbabwe afika amakhulu amabili, 1:200.
Intengo yezinto ezitshiyeneyo zikhwelile zatshiya inengi libubula kumaviki amabili edluleyo.
Isiphathamandla seNACORA uMnu Effie Dlela Ncube utshele iStudio 7 ukuthi uhulumende kumele alungise ezombusazwe kuqala nxa efuna ezenotho zihambe kuhle.
