Ugatsha lwezempilakahle kumanyano weUnited Nations olwe World Health Organisation (WHO) lukhuthaza uzulu weZimbabwe ophila legcikwane leHIV ukuba aqhubeke enatha amaphilisa anqabela ukumemetheka kwegcikwane leli kungakhathalekile ukuthi sokulembiko yokuthi umkhuhlane weAIDS ususelapheka.
Lumbiko uza ngemva kwenkulumo yomkhokheli welinye lamabandla okholo lwesiKhristu ele Prophetic and Healing Delivarence, uMprofitha Walter Magaya, otshele uzulu lentathelizindaba ukuba usethole umuthi awuthi yiAguma owelapha umkhuhlane wengculaza kanye lowemvukuzane.
Isiphathamandla seWHO, uDr. Alex Gasasira, uthi abantu baqhubeke benatha amaphilisi abo loba uMagaya esithi usethole umuthi wokwelapha umkhuhlane lo.
Inkulumo ka Dr Gasasira isekelwe nguzulu okhulumisane lalumsakazo okubalisa uMnu. Ashlegh Pfunye ongunobhala jikelele enhlanganisweni yezifundi zemakolitshini lema University, eye Zimbabwe National Student Unions.
Kodwa uMagaya yena uzwakale kumisakazo yakuleli esithi ufisa ukuthi ngabe uhulumende umtholisa ithuba lokuba umuthi wakhe uhlolwe ukuthi uyasebenza na.
Kodwa abeWHO bathi awukabi khona lowo muthi kuze kube khathesi njalo ofisa ukudinga ukuthi ukhona na kumele alandele iziqondiso zikahulumende zokukwenza lokho.
Ngakolunye udaba abomanyano wenhlanganiso ezisebenzelana lozulu ngaphansi kweCitizens Manifesto bafuna uhulumende adinge indlela zesiphangiphangi ukulungisisa isimo kwezomnotho abathi sesisibi kakhulu.
Lokhu bakuveze emhlanganweni lentathelizindaba owenzelwe eMedia Centre ngesikhathi besethula iqula lenkokheli elitshumi lanhlanu ezobumba idale abalithi yi Citizens Cabinet.
Isikhulumeli somanyano weCitizens Manifesto, uNkosazana Janet Zhou, uthi isimo somnotho sesisibi okumangalisayo kwele Zimbabwe osokumele kulungiswe ngokutshetsha ngoba abantu bayadubeka.
Umqondisi wenhlanganiso ye Bulawayo Vendors and Traders Association, uMnu. Michael Ndiweni, uthe kufanele ukuthi uhulumende alungise udaba lokusilela kwemali lamafutha ezimota lawokupheka, isinkwa lakho konke okubhekane lozulu.