amalinks wokungena

Breaking News

UNelson Chamisa Ukhethwa yiMDC Alliance Ukuthi Ancintise Kukhetho Lukamongameli Lonyaka


UMnu. Nelson Chamisa.
UMnu. Nelson Chamisa.

Umanyano wamabandla aphikisayo oweMovement for Democratic Change (MDC) Alliance ngoLwesihlanu wazise ukuba umkhokheli weMDC-T, uMnu. Nelson Chamisa, nguye ozacintisa ewummele kukhetho lokudinga umongameli welizwe lwalonyaka ngemva kokukhulumisana labamabandla akulumanyano emhlanganweni owenzelwe eHarvest House.

Ngeviki ephelileyo uChamisa ugcotshwe ukuthi akhokhela ibandla leMDC-T elalikhokhelwa ngumuyi uMnu. Morgan Tsvangirai.

Umkhokheli weMDC njalo eyisikhulumeli seMDC Alliance, uProfessor Welshman Ncube, uthe ukubekwa kuka Chamisa esikhundleni sobukhokheli be MDC Alliance yikho kuphela okulakho ukuqeda umbuso weZANU PF.

UChamisa uthe ukukhethwa kwakhe ukuthi akhokhele lumanyano kuzaba ngumthwalo onzima njengoba ethatha isikhundla lesi emuntwini obesenelisa ukumanyanisa abantu lokubanakekela okungazake kubonakale eZimbabwe.

Umongameli wePeople’s Democratic Party, uMnu. Tendai Biti, uthe sebezaqeda ukubhala ingwalo zabo ezizabasekela ekubuseni ilizwe lalezo abazazisebenzisa ekukhulumeni lozulu ukhetho lungakafiki.

Ukugcotshwa kukaChamisa sokusitsho ukuba uNkosazana Thokozani Khupe kasenelisi ukuba khona phakathi kwenkokeli yeMDC-T lakulumanyano.

UNcube uthe indaba kaMaKhupe yindaba esizalungisiswa njengoba uChamisa esethume amalunga ebandla lakhe koBulawayo ukuyakhuluma laye ngendaba ezimkhathazayo ngezenzakalo zeMDC-T leMDC Alliance.

Wengeze ethi umanyano oweMDC Alliance usulungiselela ukusebenza lamanye amabandla aphikisayo akumanyano egoqela oRainbow Coalition ekhokhelwa ngu Nkosikazi Joice Mujuru leCoalition of Democrats (CODE) ekhokhelwa nguMnu. Elton Mangoma.

XS
SM
MD
LG