Abanye babantu ababencintisa kumaprimaries ebandla leMDC T elikhokhelwa nguMnu Nelson Chamisa koBulawayo kanye labasekeli balelibandla bathi kwaba lokuqilibezela okukhulu kulolukhetho.
Bekhuluma emhlanganweni abawenzele elokitshini leMabuthweni namuhla abasekeli beMDC-T bathe abantu abanengi abavote ngeviki edluleyo kulelilokitshi ngabantu abalethwa ngamakombi bevela kwezinye indawo, hatshi izakhamizi.
Omunye walabo ababencintisa, uMnu. Giyani Dube, uthe yena kazange aziswe ngelanga lokhetho. UDube wengeze wathi abantu babevunyelwa ukuvota bephinda njalo uthe lamalunga eZanu PF lawo avota.
“Okokuqala mina njenge candidate angizange ngitshelwe ukuthi kulokhetho ngabona kuma WhatsApp, kwaba ledesk abantu ababevota kuyo egcekeni, abantu babebhalelwa ukuthi icandidate okumele liyibhalele yiphi. LeBallot paper yakhona yayibhalwe ibizo likaCharles Moyo laqgama. Abantu bavota kanengi nengi ababnye kungabantu be Zanu PF abaziwayo.”
UDube uchothoze ibandla lakhe esithi selisenza njengebandla leZANU PF.
“Leparty le yeMDCT ngendlela izinto ezenziwa ngakhona isisenza njenge ZANU PF, iZANU isize isiba ngcono ngoba vele iyaziwa ukuthi igcwele ubukopokopo.”
Amazwi kaDube agcizelelwe yisakhamuzi seMabuthweni uMnu Gibson Nyathi yena othe abantu abavotayo ngababesuka eNgozi Mine.
“Ukhetho aluhamba kuhle ngoba kwakuvotiswa abantu ababevela khatshana e Ngozi Mine, abantu balapha abavotanga. Kwavalwa ngo emini kwavota amayouth kuphela. Angisoze ngivume ukukhokhelwa ngumntwana osefuna ukuthi ngisuke embhedeni yena agade embhedeni wami.”
Ukhansila walindawo owanqotshwayo kulolukhetho uMnu Lot Siziba yena uthe bake bazama ukuyabonana lomkhokheli webandla labo uMnu Nelson Chamisa ngalokudaba eHarare kodwa bavinjwa.
“Lapha amaprimary elections akulanto eyenziwayo, yayiyirigging yodwa, bekhipha amapolling agents ethu etafuleni, bekhombela abantu ukuthi bavotele bani. Besihambile eSalibury sifuna ukuyabona umongameli, basinzwenga asisambonanga. Sithi thina amaelection lawa anull and void. Bafuna ukukhipha abantu lapha benika amaShona.”
Imizamo yokuxhumana lomgcinisihlalo weMDC-T kaChamisa koBulawayo uMnu Gift Banda yehlule.
Kodwa ukukhonona okuseMabuthweni lokhu kuyingxenye nje yomkhosi ohlatshwa ngabasekeli balelibandla endaweni ezitshiyeneyo zelizwe phezu kokungaqhutshwa kuhle kwamaprimaries abo.