Umongameli webandla leMDC-T, uMnu. Morgan Tsvangirai, usekhethe uMnu. Nelson Chamisa ukuthi abambe isikhundla sakhe ngesikhathi elokhe eselatshwa isifo semvukuzane kwele South Africa.
UMnu. Luke Tamborinyoka, isikhulumeli sikaTsvangirai, sisanda kwethula umbiko othi uChamisa uzabamba isikhundla lesi uTsvangirai aze aphenduke eZimbabwe.
“Umongameli Morgan Tsvangirai kusukela lamuhla usekhethe umsekeli wakhe uMnu. Nelson Chamisa ukuthi abambe isikhundla sakhe njengalokho okumunyethwe yisisekelo sombuso webandla leli uTsvangirai aze aphenduke ekhaya.
“Lokhu kwenziwe ngenxa yokuthi umongameli (webandla) kakho njalo abasekeli bakhe ababili labo bakwele South Africa. UChamisa uzaqhubekela phambili ebambe isikhundla somgcinisihlalo womanyano weMDC Alliance.”
UTsvangirai okwamanje ukwele South Africa lapho ayelatshwa khona isifo semvukuzane. Abanye bathi uyagula okumangalisayo kodwa abakubandla lakhe bayakuphika lokhu.
Ingcitshi ezicubungula ezombusazwe zithi ukuphakanyiswa kukaChamisa kungakhwezela umlilo wokuxabana obukhona phakathi kwabasekeli bakaTsvangirai, uMudzuri loMaKhupe abakhanya befuna ukukhokhela ibandla leli.
UMnu. Leopold Munhende, eyinye yalez’ingcwethi, uthe uTsvangirai useyehluleke ukulungisisa ukufuthelana okukubandla leMDC-T njalo inyathelo lokufaka uChamisa asekwenzile kuzahle kulibulale.
Omunye njalo oyingcitshi ecubungula ezombusazwe, uMnu. Richard Mahomva, uthe loba kungaba lokuxabana phakathi kwamalunga alelibandla, okwenziwe yiMDC-T uyakujabulela.
Unobhala jikelele wenhlanganiso yabafundi eye Zimbabwe National Students Union, uAshleigh Pfunye, uthe ukuthuthukiswa kukaChamisa kujabulise abasakhulayo akade sebekhalala ezombusazwe besithi kukhanya benganikwa amathuba okukhokhela.
Ingxenye yabasakhulayo yeMDC-T, ikhulunyelwa ngumgcinisihlalo wayo uMnu. Happymore Chidziva, isixwayise uMaKhupe loMudzuri, bona abase South Africa lapho abahluza khona udaba lomanyano owe MDC Alliance, ukuthi bayekele abakwenzayo.
UMudzuri nguye okade ephethe ubukhokheli be MDC-T, uChamisa ephethe ubukhokheli be MDC Alliance kodwa khathesi nguye osekhokhela umanyano lebandla emele uTsvangirai.
Ezinye ingcitshi zombusazwe zithe ukukhitshwa kuka Mudzuri lokungakhulunywa kukaMaKhupe kuhle kutshengise sobala ukuthi uTsvangirai ubevele ezifunela ukuthi uChamisa athathe isikhundla sakhe engasuka kuso.
UChamisa wenelise iminyaka engamatshumi amane – 40 - yokuzalwa ngeviki ephelileyo, osekumnika ilungelo lokuma ancintise kukhetho lwalonyaka lokudinga umongameli welizwe.
Kusenjalo, andla lePeople’s Democratic Party lithi lisekela inyathelo likaMnu. Tsvangirai elokuthi uMnu. Chamisa abe ephethe isikhundla sakhe kuMDC-T kanye lakumanyano weMDC Alliance, lapho i-PDP elililunga khona.
Embikweni eliwethule lamuhla, ibandla leli lithi lizakwamukela uMnu. Chamisa kuze kufike esibangeni sokuthi ancintise kukhetho lokudinga umongameli nxa kunguMnu. Tsvangirai omnika leyomvumo.
Isiphathamandla sePDP uMnu. Edwin Ndlovu uthi ibandla lakhe liyabuthemba ubukhokheli bukaMnu. Chamisa.