amalinks wokungena

Breaking News

Kubhaxabulawa Abantu Ngesikhathi uMnangagwa Esenkozweni Yokudumisa uNkulunkulu


UMongameli Emmerson Mnangagwa ukhuluma esinkonzweni yeFamily of God Church boBulawayo.

Annahstacia Ndlovu

UMongameli Emmerson Mnangagwa ungene inkozo ngeSonto yokubonga lokuzinikela eqoqwe libandla lenkonzo yokholo lwesiKristu eye Family of God Church koBulawayo.

Inkulungwane lenkulungwane zabantu bezithe gwaqa koBulawayo enkundleni eye Zimbabwe International Trade Fair (ZITF) lapho okuqhutshwe inkozo yokubonga uNkulunkulu ngokunikeza iZimbabwe ukuthula ngesikhathi kuhluthunelwe owayengumongameli uMnu. Robert Mugabe intambo zombuso ngabakubutho besekelwa ngabalwa impi yenkululeko.

Ibandla leFamily of God liqoqe lumkhosi phansi kwesihloko esithi ‘Faith for the Nation Campaign’ lanxusa amanye amabandla abalisa aweRoman Catholic, iEvangelical Church of Zimbabwe lenhlanganiso yeZimbabwe Council of Churches.

Abantu abangene inkonzo yeFamily of God Church ngeSonto eZITF.
Abantu abangene inkonzo yeFamily of God Church ngeSonto eZITF.

UMfundisi Andrew Wutawunashe owe Family of God Church ubonge umbuso kaMongameli Mnangagwa emfanisa loJoseph esithi sokumele aguqule ibizo lakhe lapho okulo Dambudzo khona afake uJoseph.

Uthe bakhangelele ukuthi uMnangagwa uzababusa ngemfanelo kulandela ukuhlupheka kwabantu abanengi ngaphansi kukahulumende kaMugabe.

Amalunga edale lephalamende ebandla elibusayo inkokheli zomdabu labo kade bekhona kulumkhosi.

UNduna Mtshana Khumalo ubonge ukuza kukamongameli koBulawayo esithi kuqakathekile.

UMfundisi Useni Sibanda ngomunye wabafundisi abasuka kwezinye inkozo okhonze loMongameli Mnangagwa esithi kuhle ukubona uMongameli eqakathekisa ukukhonza kwamabandla okholo ahlukeneyo.

UMagura Charumbira, osakhulayo webandla leZANU-PF, uthe njengabasakhulayo bakhangelele ukubuswa kahle kanye lokuvulwa kwamankampani koBulwayo.

Abenkonzo yeZCC labo bebekhona bajabulise abantu ngokuhlabelela amaphimbo amnandi ngeziginci ezehlukeneyo ngapha betshitshimba kukhala phansi.

Kusenjalo, kulamalunga ebandla leMthwakazi Republic Party abathethwe libutho ngesikhathi uMnangagwa esenkonzweni le. Abalandeli laba bebethwele amabhakani atshengisela ukuthi uMnangagwa ngomunye walabo abaphatheka kumbhuqazwe weGukurahundi kusukela ngomnyaka ka1981 kwaze kwayafika umnyaka ka1987.

Ababotshiweyo babalisa uMnu. Brighton Ithuthung Sibanda umngcini ngcebo weMRP, ozamela iBeitbridge kukhetho oluzayo, uThembelani Mfulongashi Mpofu ozamela iMRP eNkayi, uMalwande Nyathi ozamela iMRP eGwanda South, uKhethani Nxebalendoda Ndlovu ozamela Imrp eGwanda South kukhetho oluzayo, uNkosilathi Ncube ozangena kukhetho oluzayo engukhansila we Mzingwane, uMarshal Sibanda, uPetros Mkhize bakoBulawayo, loSehliselo Ndebele we Matabeleland North.

UMongameli Emmerson Mnangagwa lomkakhe, uNkosikazi Auxillia Mnangagwa, basenkonzweni eqoqwe yiFamily of God Church.
UMongameli Emmerson Mnangagwa lomkakhe, uNkosikazi Auxillia Mnangagwa, basenkonzweni eqoqwe yiFamily of God Church.

Ababotshiweyo babikwa betshayiwe kabuhlungu ngabebutho phambi kukazulu enkonzweni basiwa enkambeni yebutho ekoBulawayo eBrady Barracks bengakahanjiswa esitokisini samaphalisa ese Bulawayo Central Police Station.

UMongameli weMRP, uMqondisi Moyo, uthe akuvunyelwa okwenziwe libutho libambisana lamapholisa.

Olwela amalungelo oluntu, uMnu Effie Ncube, usole isenzo sebutho sokutshaya amalunga eMRP abetshengisela esithi isisekelo sombuso siyabapha lelo lungelo njalo ukubhulwa abakwenziwe libutho kubi kakhulu kubakhumbuza kusabusa uMugabe.

UMnangagwa ucatshangelwa ukuthi waphatheka kumbhuqazwe weGukurahundi okwabulawa khona abantu abafika inkulungwane ezingamatshumi amabili – 20,000.

UMnangagwa uyakuphika konke lokhu.

Facebook Forum

XS
SM
MD
LG