amalinks wokungena

Breaking News

Woza Friday: UNkwali Uphakulela Uzulu ldlalede Elitsha uThemba


UNkwali utshaye kwazwela koBulawayo esethula idlalade elitsha uThemba. (Photo: Ezra Tshisa Sibanda)

KuWoza Friday liviki silelethela umculi wase Zimbabwe ohlala kwele Germany, uNomathamsanqa Mkhwananzi, odume ngegama lokuthi nguNkwali osekhaya okwamanje lapho abelomkhosi wokwethula idlalade elitsha.

UNkwali wethula idlalade elitsha koBulawayo. (Photo: Ezra Tshisa Sibanda)
UNkwali wethula idlalade elitsha koBulawayo. (Photo: Ezra Tshisa Sibanda)

Bekungabizwa ozwayo ngoLwesine ntambama emcimbini oqoqwe nguNkwali ecula lokugidela abalandeli bakhe, abaphathi bedolobho lako Bulawayo abagoqela uMayor Solomon Mguni, amakhansila kunye labahloniphekayo balelidolobho.

"Sengiphendukile njalo balaleli yimi owenu uNkwali sengibuye ledlalade lami elitsha elesibili elithi Themba. Idlalade leli ngilibize ngalithi Themba ngoba kulibizo likababa ongizalayo uCharles Themba Mkwananzi. Ubaba usitshiye ngomnyaka ka2018. Ubengumuntu ongisekela kakhulu kwezomculo."

Uledlalade lakhe lakuqala elembube elithiwa Sithokozile, leli elitsha alibiza uThemba lileziginci njalo ulipheke kamnandi.

"Ilengoma eziyi eight ilengoma zamasiko ilengoma zothando, ilengoma njalo ekhuluma ngokuhlukuluzwa kwabomama labantwana. So, ingoma yenu ethi Uyimbokodo ilevideo. Ngenani kuYoutube liyibone."

UMeya wedolobho lakoBulawayo, uMnu. Solomon Mguni, lezinye iziphathamandla zekhansili, zibukele uNkwali esethula idlalade elitsha. (PHOTO: Ezra Tshisa Sibanda)
UMeya wedolobho lakoBulawayo, uMnu. Solomon Mguni, lezinye iziphathamandla zekhansili, zibukele uNkwali esethula idlalade elitsha. (PHOTO: Ezra Tshisa Sibanda)

Umcimbi kaNkwali uqoqwe yiNhimbe Trust eyinhlanganiso esebenza ukuthuthukisa abaculi besifazane. Ikhuthaza kakhulu ngokulondolozwa kwamasiko, isintu, lemvelaphi kazulu besebenza lomuzi wakoBulawayo.

Umnunzana Joshua Nyapimbi, umkhokheli weNhimbe Trust, uthi, "Sikubona kuqakathekile kakhulu ukuthi sisekele inhlelo zabatsha kakhulu amantombazana labomama abaculayo. Iproject yethu yakuqala kulokhu lidlalade elitsha elikaNkwali elithi iThemba. Asithengeni umculo wakhe.

Usodolobho uMayor uSolomom Mguni ungomunye wenkokheli ezimbalwa ezithakazelela ukuthuthukisa abaculi bako Bulawayo.

UNomathamsanqa Mkhwananzi usanda kwethulela uzulu idlalade elitsha elithi uThemba. (PHOTO: Ezra Tshisa Sibanda)
UNomathamsanqa Mkhwananzi usanda kwethulela uzulu idlalade elitsha elithi uThemba. (PHOTO: Ezra Tshisa Sibanda)

"Sizimisele ukusekela ama-artist ethu ngoba uzananzelela ukuthi sithe singena ngo2018 sidinge esingathi ngesilungu utechnical partner ongasincedisa. Sisebenza kanye leNhimbe Trust ukuthi siqoqe ama-artists. Kunengi esikwenzayo ngoba ama-artist phela yiwo ayenza ukuthi uBulawayo azakale njengesigodlo singathi ezemidlalo ezokuhlabelela ezokucula konke. Sikhangele iCOVID-19 leyi kade bengenelisi ukuthi baperfome, esikwenzileyo yikuthi labo benelise ukuthola ukudla okwamanje sisebenza ukuthi labo bathole izindlu."

UNkwali ulipheke ngobunono idlalade lakhe uThemba. Lona selitholakala na? Ucela limfakele izandla.

"KuGoogle stores uhambe ku iTunes uyithole uyithenge kuAlbum. Ngilekhasi lami kuFacebook uNkwali lapho lingangilandela labafisa ukuthi nxa bengathola iCD yona ngokwayo liyenelisa ukuthi libhalele khonapha kuNkwali sizaliphendula sibone ukuthi iCD yenu singayifinyelelisa njani. KuTwitter ngingu Nkwali_music, ngokufanayo njalo kuInstangram Nkwali_music then kuYoutube ngilamavideos ambalwa lapha elingahamba khona liyebona ukuthi kanti uNkwali wakhona nguphi."

Lelidlalade likaNkwali elitsha uThemba ngesilungu okutsho ukuthi HOPE, likhwabithwa ngabantu abanengi, limnandi, liyahlakaza.

Facebook Forum

XS
SM
MD
LG