amalinks wokungena

UMugabe Usekhitshiwe Esikhundleni seWorld Health Organization Sokulwisana Lemikhuhlane eAfrica

  • Gibbs Dube

UMongameli Robert Mugabe

Inhlanganiso yamazwe womhlaba wonke jikelele eye World Health Organization (WHO) ithi isibisele emuva ukukhethwa kukaMongameli Robert Mugabe ukuthi abengummeli wamazwe kuzwekazi leAfrica wokulwisana lemikhuhlane enjenge diabetes, cancer lokunye okubizwa ngokuthi ngama non-communicable diseases.

Umqondisi weWHO, uMnu. Tedros Ghebreyesus, uthe ukunanzelele ukuthi ukukhethwa kukaMugabe sokudale ukukhuluma okumangalisayo ebantwini ngakho-ke ubona kufanele ukuthi akhitshwe kulesosikhundla.

UGhebreyesus wethule lokhu ebulenjini beInternet kukhasi leWHO ngeSonto.

Uthe, “Kunsukwana ezedluleyo ngizidle ingqondo ngokukhetha uMongameli Robert Mugabe ukuthi abeyisimmeli seWHO sokukhankasela ukulwisana lemikhuhlane ebizwa ngokuthi ngama NCDs (non communicable diseases) kuzwekazi leAfrica. Sengicabange ukuthi ngikubisele muva lokhu.

“Ngilalele zonke izikhalazo zabantu. Ngikhulumisane lohulumende weZimbabwe savumelana ukuthi lokhu engikwethula khonamanje kuzanceda inhlanganiso yeWorld Health Organization. Inhlonso yami yikuthi ngibumbe inhlanganiso ekhangelane lenhlupho zabantu bonke kwezempilakahle emhlabeni wonke jikelele. Inhlanganiso le kumele isebenzele njalo imele umuntu wonke.”

UGhebreyesus uthe akufunayo yikuthi kubelenkokheli esebenza labantu bonke okuzakwenza ukuthi abantu babambisane ekuqhubeni imisebenzi yeWHO.

“Kumele sakhe ubudlelwano sisebenze sonke ukwenzela ukuthi siqhubekele phambili sithuthukisa ezempilakahle. Ngiyalibonga lonke elikhulume okutshiyeneyo ngodabalolu. Yikho lokhu okusenza silethulele inhlelo ezibalulekileyo. Langikhethela ukuthi ngenze kahle umsebenzi lo.”

Kubelokukhala emhlabeni wonke jikelele uGhebreyesus esekhethe uMugabe ukuthi abengummeli weWHO obona ngokulwisana lemikhuhlani engamethekiswa yikuhlangana kwabantu.

Abachothoze akwenzileyo bathe uMugabe angeke enze umsebenzi lo ngoba usebhidlize ezempilakahle kwele Zimbabwe njalo yena nxa engagula welatshwa emazweni asempumalanga anjenge Singapore.

Abamsekelayo bathi kumele akwenze lokhu ngoba ulwela ilungelo labantu abancindizelwe ngabanye emazweni atshiyeneyo.

Facebook Forum

XS
SM
MD
LG