Abesifazana abalitshumi lambili abahlala esiqintini seNyandeni phansi kweNduna uMasuku kuWard 5 eGwanda sebeqoqene ukuze basungule ibhizimusi lokufuya inkukhu zemakhaya.Omama laba bayazakhela izilugu zenkukhu njalo bazenzele imisebenzi evame ukwenziwa ngabesilisa efana lokuvoxa udaka.Bathi bakwenza lokhu ngoba kungumlandu wabo ukunakekela imuli emakhaya.
Abesifazana laba bazakhela ngokwabo isilugu senkukhu bencediswa ngowesilisa oyedwa kanye lenhlanganiso yeMasakhane Trust.
UNkosazana Sibusisiwe Ndlovu ngunobhala jikelele wenhlanganiso yeNtuthuko njalo uthi bangene bengomama kuphela ngoba kuyibo abathwala ubunzima emakhaya.
Ugcizelele wathi njengabafuyi benkukhu abasacathulayo basaludinga ulwazi lokufuya ukuze uhlelo lwabo luphumelele.
UNkosazana Rosy Moyo umgcinisihlalo weNtuthuko uthi bakhangelele ukuthi bathole imali ezabasiza ekuhambiseni abantwababo ezikolo.
Kodwa ayisibo bonke omama abenelisa ukuthi baziphandele kulesisabelo.UNkosazana Sophie Mlilo oleminyaka yokuzalwa efika phose ikhulu 97 uthi uyaludinga usizo kuhulumende ngoba engeseneleisi ukuthi avuke azenzele.
Ukhansila weNyandeni uMnu Adam Bhebhe uthi omama beNtuthuko bazakuba yisibonele esihle kwezinye izakhamizi.
Omama beNtuthuko bathi bakhangelele ukuthi baqale ukufuya inkukhu zekhaya kumaviki ambalwa alandelayo njalo bazazithengisela iloba ngubani ozifunayo.
