Abaphila ngokuthenga lokuthengisa imali yakwamanye amazwe ezitaladeni zeGwanda ababizwa ngokuthi ngoSiphatheleni bebezisebenzela njenge nsukwini bengagqize qhakala kungenani lokuthi uhulumende sethule umthetho othi bazagwetshwa ukuhlala ejele iminyaka efika elitshumi nxa bethe batholakala belecala lokuqhuba lumsebenzi okungekho emthethweni.
Osiphatheleni bebezihlalele esitaladini sika Soudan phakathi kuka 3rd lo Fourth Avenue beziqhubela umsebenzi wokuthenga lokuthengisa imali yakwamanye amazwe emphakathini bengela kuwesaba.
Uhulumende wethule umthetho omutsha olawula ukuba Osiphatheleni bagwetshwe iminyaka efika elitshumi ukuhlala ejele nxa bethe batholakala beqhuba lumsebenzi ezitaladeni.
Lokhu kuza ngesikhathi iZimbabwe ibhekane lenhlupho zokungahlaliseki kwezomnotho osekudale ukusilela kwempahla enengi okugoqela yona imali ngokwayo, amafutha ezimota lokunye.
OSiphatheleni abaxoxe lomsakazo we VOA Studio 7 bathe bazaphuma lamanye amaqhinga okubalekela amapholisa ngoba kuyiyo yodwa indlela yabo yokuziphilisa.
UMnu. Gilbert Mathe, omunye wamajaha abaphila ngokuthenga lokuthengisa imali yakwamanye amazwe, uthe kakula ngenye indlela njengoba kungela msebenzi.
“Yiwo umsebenzi engiwenzayo ngenxa yokuswelakala komsebenzi. Lokhu ngikwenza ngoba umsebenzi kawukho. Njengosiphatheleni umthetho omutsha lo wokuthi uyavalelwa iminyaka engu10 awusijabulisi ngoba uzakwenza abantwana balambe.”
UMnu. Morris Nkala, ocubungula ezombusazwe, uthe kuyize ukufaka imithetho efana lalo owethulwe nguhulumende ngoba labo abathumela Osiphatheleni ezitaladeni kuyiziphathamandla ezingamapholisa lezikuhulumende.
“Singakuthini thina sizwe kuthiwa imithetho sijikile labo abathengisa izimali sokumele babotshwe okufika iminyanga elitshumi but lokhe sisakhona emigwaqweni isimanga yikuthi kanti vele bona basebenzela bani ngoba inengi labo sizwa kuthiwa abanye ngabafazi bamapholisa abanye basebenzela abakhulu abayibo abafaka limithetho so yikukhuluma nje ukuthi sicabange ukuthi bazasuswa bona bezahlala bekhona.”
Amandla emali yeBond Note lokhe ephansi lapho liqathaniswa leRand ngoba kunje ibond note elilodwa libiza amaRand athoba munwe munye - R9 kuthi idola lakwele Melika libiza amaRand alitshumi lantathu-R13.
Imizamo yokuxoxa lamapholisa ngaloludaba iyehlule.
