amalinks wokungena

Breaking News

UDouglas Rogers Uloba Ugwalo Oluveza Ukususwa Kuka Mugabe Esikhundleni


Ugwalo olulotshwe nguMnu. Douglas Rogers.

Odabuka kwele Melika uselobe ugwalo oluveza ukususwa kowayengumongameli, uMnu. Robert Mugabe, esikhundleni olulesihloko esithi ‘Two Weeks in November: The Astonishing Untold Story of the Operation that Toppled Mugabe’.

Intathelizindaba, uDouglas Rogers, singathi wabalenhlanhla ngokuthi abekwele Zimbabwe ibutho lisusa uMugabe esikhundleni. Wayeqhatshwe liphephandaba ukuthi alobe ngezemvelo elabanye bakhe kuzwekazi leAfrica engazi ukuthi uzazibonela uMugabe esuswa esikhundleni phezu kokubusa okweminyaka engamatshumi amathathu lasikhombisa.

“Ngangizihambela labangane bami abathathu sisuka eZimbabwe sisiya eMozambique kumele ngilobe ugwalo lwezemvelo. Sezwa kuthiwa umsekeli kaMongameli uMnangagwa usexotshwe umsebenzi. Sezwa njalo kuthiwa usebalekile eZimbabwe waya kwele South Africa ethembisa ukuthi uzabuyela eZimbabwe ngesikhatshana. Kwangjmangalisa lokhu.”

Ugwalo olulotshwe nguMnu. Douglas Rogers.
Ugwalo olulotshwe nguMnu. Douglas Rogers.

URogers wananzelela ukuthi ukuxotshwa kukaMnangagwa kwenzakala ngesikhathi elwisana loNkosikazi Grace Mugabe owayekucele leGeneration 40 kubandla leZanu PF elalifuna ukuthi athathe isikhundla sikaMugabe. Lomkhokheli webutho uGeneral Constantino Chiwenga wayesanda kwethusela uMugabe lomkakhe.

“Ngananzelela ukuthi kuzakwenzakala okukhulu eZimbabwe. Kwasithatha isikhathi eside ukuthi siyefika eZimbabwe lapho esathola ibutho selingenele. Ngangikhona abantu betshengisela emigwaqweni. Kwakunganisibukele okuthiwa yimovie ngeSilungu.”

URogers uthi wabikela owayebalobela ugwalo lokwethekelela ezemvelo kuzwekazi leAfrica ukuthi kungcono alobe ngokwenzakala eZimbabwe. Bavumelana waseloba ugwalo lolu lapho aveza okwenziwa ngabantu abanjengodabuka kwele Zimbabwe uTom Ellis, okungayisilo ibizo lakhe lokuzalwa. UEllis wasebenza kakhulu ekususeni uMugabe esikhundleni.

“Le yindoda emhlophe edabuka eZimbabwe ehlala kwele South Africa oselesikhathi wangena kwezombangazwe.”

UEllis wavezela URogers indlela abantu abazondanayo ababambisana ngayo befuna ukususa uMugabe esikhundleni. Bagoqela uKasper, olipholisa lasensitha elikuhlangothi lwezomvikela olwe Central Intelligence Organization, owavezwa kugwalo lolu ngegama leli lokusoma.

UMnu. Chris Mutsvangwa loMnu. Victor Mademadanda
UMnu. Chris Mutsvangwa loMnu. Victor Mademadanda

Abanye njalo abaphathisayo ngowayekhokhela abalwa impi yenkululeko uMnu, Chris Mutsvangwa, uMnu. Gabriel Shumba, igqwetha elilwela ilungelo likazulu, labanye abakunhlanganiso ezitshiyeneyo. Balobelana isivumelwano sokusekela uMnangagwa ebasibiza bathi yiNorthgate Declaration. Lokhu kwakucanda indlela yokususa uMugabe esikhundleni.

“Kuyamangalisa ukubona umuntu onsundu okuCIO lomlungu ongusomabhizimusi besemoteni eJohannesburg emagcekeni kazulu besithi kulento abafuna ukuyenza. Balobelana isivumelwano sokusekela uMnangagwa owayefuna ukugenqula uMugabe. Babesekela icele lebandla leZanu PF eleTeam Lacoste elalifisa ukuthi uMnangagwa angebe esikhundleni sikamongameli. Lokhu ngibona engani yikho okwenza uGabriel Shumba labanye bakhe bakusekele.”

FILE - UMnu. Emmerson Mnangagwa esesengumsekeli kamongameli, April 7, 2017.
FILE - UMnu. Emmerson Mnangagwa esesengumsekeli kamongameli, April 7, 2017.

URogers, kugwalo lolu olujulileyo, waphendlaphendla wathola abantu abamtshela ngokwehlela uMugabe loMnangagwa esanda kususwa esikhundleni njalo ebaleka elizweni, esedlula kwele Mozambique wazewayafika kwele South Africa ethwelwe yindizamtshina kasomabhizimusi uMnu. Justice Maphosa, odabuka eZimbabwe.

Esiya eMozambique uMnangagwa kuthiwa wathwala nzima esiya emgceleni eMutare lapho ayebalekela amapholisa emigwaqweni njalo echapha umgcele encediswa libutho waze wangena eshabhini wahamba ngenyawo okwesikhathi eside.

“Bathola umbiko othi kungcono babaleke elizweni ngikushesha ebusuku ngoba kulabantu ababefuna ukumbulala. Yikho okwenza ukuthi kwenziwe amalungiselelo okuthi asuke elizweni. Kuyamangalisa okwenzakalayo. Kulabanye abathandabuzayo kodwa ngilemikayezelo yama WhatsApp njalo labantu phose abalitshumi abakusekelayo lokhu. Kuyamangalisa.”

URogers ukubeka sobala okwenziwa nguGeneral Chiwenga njalo lokwakusenzakala ngasese kukhulunywa labamele amazwe atshiyeneyo okwakusethulwa nguMutsvangwa, owayephethe njalo ukwethulwa kwezindaba. Babefuna uMugabe asuswe esikhundleni kungafanga muntu.

UNkosikazi Grace Mugabe
UNkosikazi Grace Mugabe

“UMutsvangwa wayekhangele ukwethulwa kwemibiko yalokhu ababekwenza, ukukhuluma labakwanye amazwe okugoqela uJacob Zuma iwatshelwa ububi bonke beG40 eyayikhokhelwa nguNkosikazi Mugabe. Waveza uG40 njenabantu abafuna ukubhidliza abalwa impi yenkululeko.”

URogers uveza njalo okwehlela umuyi uMorgan Tsvangirai lebandla lakhe eleMDC elalizama ukususa uMugabe esikhundleni. Uthi uKasper okugwalo lolu wayekhokhela abavikela uTsvangirai kubandla leMDC.

“Ngibona engani lokhu yikho okwenza ukuthi ibandla leMDC linganqobi kukhetho njalo ukuthi eleZanu PF lihlale lisazi ngokwenzakala kweliphikisayo. Ngibona engani uKasper wangena kubandla leli wabamunya umungula.”

Ugwalo lolu olulamapheji adlula amakhulu amabili lamatshumi amahlanu- 252 - lwadindwa kwele South Africa. URogers uthi ulethemba lokuthi ugwalo lolu luzavezela abantu bonke emhlabeni wonke jikelele ngezombangazwe kwele Zimbabwe. Uthi abachothoza ukuthi waloba ngabanye abantu engazange abaqambi ngamagama kumele bahlaliseke ngoba uyabazi bonke.

Kuvezwa Indlela uMugabe Asuka Ngayo Esikhundleni
please wait

No media source currently available

0:00 0:07:04 0:00

Facebook Forum

XS
SM
MD
LG