amalinks wokungena

Breaking News

Odokotela beHarare Basungula Uhlelo Lokuhlola Abaswelayo Kungela Mbadalo


Odokotela beHarare Basungula uhlelo losizo lokuhlolwa kwezigulane kungela mbadalo emzini weParktown

Ngokubona abantu bethwele nzima ukufinyelela usizo lokwelatshwa elizweni lonke jikelele ngenxa yokungamanga kuhle kwesimo somnotho, kulabodokotela asebethathe inyathelo lokusungula uhlelo lokuphathisa uzulu ngokuhlola izifo ezehlukeneyo kungela mbadalo kanye ngenyanga.

ODokotela laba bakhokhelwa nguDokotela Jeremiah Mhamba wesibhedlela esizimeleyo ese Parktown Community Hospital esizemzini we Waterfalls, eHarare. UMhamba uthi kuzwisa usizi ukubona inkinga ezibhekane lozulu edabeni lokufinyelela ezempilakahle.

UDokotela Jeremiah Mhamba wesibhedlela seParktown Community Hospital
UDokotela Jeremiah Mhamba wesibhedlela seParktown Community Hospital


“Sihlangana labantu abanengi kakhulu esibona ukuthi abenelisi sibili ukuzelaphisa .Abala mali , abakho ku medical aid kube nzima.Laba bantu bagoqela abantu asebegugile,Abafelokazi,abantu makhaza bonke nje,Intandane , abantu abaphila lobugoga labantu abaswelayo nje abangenelisi ukufinyelela ezempilakahle sabona kufanele ukuthi singenele siphathise.”

Umnumzana Albert Mazula wenhlanganiso yamalungelo ezakhamizi eyeHarare Residents Trust uthi bamukela lelinyathelo ngenjabulo ngoba lenzakala ngesikhathi umumo ungamanga kuhle ebantwini.

“Ungakhangela khathesi abantu abala mali. Nxa sikhangela imali ebhadaliswa ngo dokotela lezibhedlela ezizimeleyo yimali engenelisi ukubhadalwa ngabantu yikho sisithi lokhu sikutshayela izandla sibili ngokuzinikela kwabo ukuhlola abantu kungela mbadalo lokhu kukhomba ubukholwa kibo.”

UMazula uthi ngokuqhubeka kwabodokotela bekhalala umsebenzi lokungamanga kuhle kwesimo somnotho elizweni abantu sebehlala behlukumezekile ikakhulu abasemizini ehlala abanengi abacina bebanjwa ngamandla ukuya zama kubosiyazi lamaporofita ngokuswela.

“Abantu abasenelisi kuthi baye ezibhedlela nxa begula ngentengo ephezulu kangaka .Kwesinye isikhathi uzwa kuthiwa bafuna ama ten thousand bond kumbe ukwedlula .Umuntu uyabe eyaithatha ngaphi khona ehola ama khulu amane kumbe amahlanu ama dollar kulowo osebenzayo lokhu kunzima sibili.”

Umqondisi waloluhlelo esisibhedlela seParktown Community Hospital, umnumzana Berry Muchenje uthi abantu abanengi kabala lwazi lohlelo losizo lokwelula umzimba ngemva kokwehlelwa yingozi loba umkhuhlane owestroke olwe Physiotherapy becabanga ukuba bangeke balufinyelela.

UMuchenje okhokhela inhlelo zabodokotela besibhedlela seParktown Community Hospital
UMuchenje okhokhela inhlelo zabodokotela besibhedlela seParktown Community Hospital


“Abantu abanengi abakwazi ukuthi kula mafacilities angabancedisa ama problems abo .Yebo ye bakhona abelatshwayo kodwa abanengi bayalugcina udubo kukanti yikungazi nje kuphela ngoba lulakho ukulungisiswa luphela yi physiotherapy.”

Lolu hlelo lubikwa solusaziwa okokuthi luthola abantu abavela endaweni ezitshiyeneyo ze dolobho le Harare ezifana lemzini weWarren Park, Glen view, Highfields, Braeside, Hatfield leminye, bezophathiswa.

Inengi labantu esikhulume labo bathi ngabe iyanda imisebenzi enje hatshi e Harare kuphela abantu bencedisane .

Lolu hlelo lwenziwa ngoMgqibelo wakuqala wenyanga njalo kuqoqwa ukuphathisa ngokuhlola abantu kungela mbadalo, imikhuhlane enjenge BP le tshukela, ukunikeza ulwazi lokuphathiswa ngemitshina yePhysiotherapy, ukuhlolwa amazinyo, ukunikeza ulwazi omama abazithweleyo lokunye.

Kusukela ngeminyaka yabo 1990 kusiya ku 2000 ele Zimbabwe lavela laqala ukubhekana lodubo lokulahlekelwa yizisebenzi zezempilakahle ngesilinganiso sokungamatshumi atoba minwe minwemibili ekhulwini-80%, zisiya kwamanye amazwe zikhala ngeholo eliphansi. Lezi zisebenzi zigoqela abongi, odokotela, ama oncologist, paediatricians ingcwethi zokubelethisa lezinye izisebenzi.

Umumo ube mubi ngamandla ngomnyaka osanda kwedlula, lapho odokotela abasebenzela ezibhedlela zikahulumende abakhalale umsebenzi bekhonona ngeholo eliphansi, kwaphazamisa ezimpilakahle elizweni lonke ngesikhathi ilizwe libhekane lokuqhamuka kwezifo ezehlukeneyo lapha lalaphaya ezifana lesihudo secholera lezinye.

Incitshi zezempilakahle zithi uhulumende kumele aqinise umsebenzi wokuvikela imikhuhlane owePrimary Health Care lokuhlolwa kwezifo zingakahlaseli okuthiwa yiDisease Surveillance, alungisise isimo somnotho ukuze konke kuphathise uzulu hatshi emadolobheni kuphea kodwa lasemaphandleni.

Udaba lohlelo lwbaodokotela beParktwon Hospital siluphiwa nguMark. P Nthambe
please wait

No media source currently available

0:00 0:04:49 0:00

Facebook Forum

XS
SM
MD
LG