amalinks wokungena

Breaking News

Odokotela Bathi Kababuyeli Emsebenzini Lanxa Besethuselwa Ngumqhatshi


 Odokotela betshengisela esibhedlela seParirenyatwa
Odokotela betshengisela esibhedlela seParirenyatwa

Sekuzinsuku ezedlula inyanga odokotela bekhalala umsebenzi besithi iholo labo alisabavumeli ukuthi benelise indleko yokuya emsebenzini. Batshilo njalo ukuthi iholo liya lisiwa isisindo laloba uhulumende ethembise ukulikhuphula ngesilinganiso esingamatshumi ayisithupha.

Odokotela bathi lokhe belethemba ukuba kuzaze kutholakale indlela engcono yokuthi bazwisisane lohulumende ukuze babuyele emsebenzini hatshi ukuba bethuselwe njengalokhu okukhulunywe ngumphathintambo wezempilakahle umnumzana Obadiah Moyo.

UDokotela Mthabisi Anele Bhebhe uthi ukuze babuyele emsebenzini kumele bazwanane lomqatshi ukuba uzabapha imali eyanelayo njalo iqansa maviki onke.

“Lamuhla lilanga lesi 35, lokhe siku incapacitation singela mali yokuya emsebenzini. Odokotela bonke eZimbabwe lathi esiko Bulawayo kasiyi emsebenzini. Lokhe simelele i ministry of health lo minister uDoctor Obadiah Moyo le Health Services Board, kuyibo abasibhadalayo ukuthi basiphe imali ezikwanileyo zokuthi siye emsebenzini. I fuel silokhu iqansa every week so asilayo imali yokuya emsebenzini, so esikumeleleyo khathesi yikuthi baqalise ukuthi sikhulume sizwanane ngokuphangisa and inkulumo zakhona kumele ziphele ngokuthi siphiwe imali ezabe iyenelisa, ikhwela ngeviki ngeviki ukuthi siye emsebenzini.”

UDokotela Tawanda Zvakada unobhala jikelele wenhlanganiso yabo dokotela uthi lokhe belethemba ukuba ngemva kokukhulumisa kabanzi lohulumende hatshi okwethuselwa kuzaze kube lempumela enhle.

“Mhlaka 3 Nkwenkwezi odokotela batsho ukuba abasenelisi ukuya emsebenzini ngoba iholo lingeneli hatshi ukuba bakhalala umsebenzi. Siyananzelela ngokudana ngamazwi akhulunywe ngu minister ngoMqibelo emini, kulusizi ngoba amazwi akhe ngeke anelise ngitsho lodokotela oyedwa, kanye labanye bonke ukubuyela emsebenzini.Lokhe sithemba ukuthi impendulo izaze itholakale ngenva kokukhulumisana kabanzi, hatshi ukwethuselwa.Kulusizi ngoba lamuhla sekukwane amalanga angamatshumi amathathu lanhlanu izibhedlela zingasebenzi kuhle.Kusobala ukuthi kumvukela okhona olethwa yikunganaki kukamqatshi ukuthi angenele masinya kulokhu.”

Umnumzana Anthony Majongosi omela abongi besibhedlela seUBH uthi akusasebenzeki ezibhedlela.

“Indaba yama doctors ukuthi aku strike, akusebenzeki kuhle. Ngoba odokotela kuyibo aba admitter ama patients njalo ebhale imithi yokuthi sinike ama patients, so akusebenzeki kuhle. Ukuthi umsebenzi wethu uhambe phambili kumele sisebenze sonke. Lathi futhi indaba yemali engasakwani,izinto azisathengeki, ukhwela every day. Siyafuna ukuthi ama doctors aphenduke emsebenzini ukuthi sisebenze kuhle siqhubekela phambili. Njalo futhi ama patients ethu asikwanisi ukubanceda ngoba ama doctors engekho.”

Omunye wezakhamuzi zakoBulawayo unkosikazi Sihle Ndlovu uthi umumo lo okhona ezibhedlela uyingozi kumpilakahle kazulu.

“Sizwa sisesaba njalo silokudana okukhulu ngomumo lo osezibhedlela. Abantu sebesithi bengagula babulawe yi stress sokuthi ngizelwatshwa ngubani odokotela bengekho. Uhulumende kumele aphange alethe impendulo ngoba ukungabi khona kukadokotela kuyingozi kumpilakahle kazulu ngoba abantu abaselatshwa ngokugcweleyo ezibhedlela. Uhulumende kabaphe imali ngoba impilo ezitshabalalayo singeke senelise ukuzithenga futhi.” Odokotela bathi abakhalalanga umsebenzi kodwa imali yiyo engabavumeliyo ukuya emsebenzini. Abenhlanganiso yabodokotela eye Zimbabwe Hospital Doctors Association bethule umbiko izolo besithi njengoba kusobala ukuthi uhulumende akazimiselaga ukulungisisa izikhalazo zabo sebekhuthaza abamankampani lozulu ukuthi bangenele ekukhulumisaneni lohulumende ukuthi kungenziwani.

please wait

No media source currently available

0:00 0:03:40 0:00
XS
SM
MD
LG