amalinks wokungena

Breaking News

Kwenziwani Sokusele Inyanga Ezingafiki Ezimbili Ukuthi Ukhetho Lwenziwe eZimbabwe


ZEC

Ngokutsho kwesisekelo sombuso esitsha, ukhetho kumele luqhutshwe iminyaka emihlanu yedale lephalamende ekhona ingakapheli. Njengobake limnyaka yedale lephalamende elikhona iphela mhlaka 21 Ncwabakazi 2018, kukhangelelwe ukuthi ukhetho lubekhona kungakadluli leli langa.
Abazakwenelisa ukuvota ekhethweni lwalonyaka ngababhalisileyo ukuvota kanti umuntu kuzafuze avotele endaweni (voting station) ese wardini (Ward) yakhe njalo endaweni yakhe ngokokuvota (iConstituency). Isibonelo ngesokuthi ohlala ku Ward 15 eLuveve njalo ebhalise khona, uzavotela eLuveve Primary, ephansi kweWard 15 yekhansili ledolobho lakoBulawayo, phansi kweConstituency ye Luveve.
Kulamabandla edlula ikhulu (107) abhalise ukuncintisa ukhetho lwalonyaka. Osekucaca yikuthi ibandla leZanu pf lomanyano we MDC Alliance wecele elikhokhelwa ngumnumnzana Nelson Chamisa yiwo amabandla abonakala ehamba phambili. Amanye okukhanya ezabonakala kakhulu kulolukhetho ngumanyano weMDC okhokhelwa ngunkosazana Thokozani Khuphe, umanyano we Rainbow Alliance okhokhelwa ngunkosikazi Joyce Mujuru, iCoalition of Democrats laleli elihlubuke kuZanu pf ele National Patriotic Front.
Njengoba lolu kulukhetho oluhlanganisa bonke abavotelwayo, ovotayo kuzafanele esiyangena ebhokisi lokuvota esazi ukuthi esikhundleni sikamongameli welizwe ufuna ukuvotela bani, umeli wedale lephalamende amfunayo ngubani, uSenator amkhethayo nguphi kanye lokuthi uthande bani kumakhansila.
Lobanje emanengi amabandla azancintisa kusikhundla sikamongameli, ingcitshi zithi umjaho omkhulu ozaba phakathi komkhokheli weMDC Alliance umnumnzana Nelson Chamisa oleminyaka engamatshumi amane (40) yokuzalwa lomkhokheli webandla leZanu pf umnumnzana Emmerson Mnangagwa oleminyaka engamatshumi ayisikhombisa lanhlanu yokuzalwa (75).
Ekhethweni lukamongameli zingaba ngutshiki lobhanqa, kumbe onqobileyo ehluleke ukwedlula isilinganiso sengxenye yamavoti ekhulwini (50%) levoti elilodwa (1 vote), luzaqhutshwa kabutsha ukhetho lukamongameli kuze kutholakale onqobe kwacaca.
Umbali, ingcitshi kwezombusazwe njalo engunobhala webandla le United Democracy Movement umnumnzana Andrew Nyathi uthi esikhundleni sikamongameli akufuzanga abantu bavotele umuntu ngoba ehlakaniphe kakhulu loba ekhanya elamadlabuzane.

Umuntu oqakathekileyo nguwe wena ovotayo. Kumele ubekwazi ukuthi ufunani wena. Ubususithike njengoma mina ngifuna into engaka, kutsho ukuthike, usibanyabanyana nguye umuntu engingamfaka lapho, ukuthi ngimvotele angisebenzele ngoba ngike ngamuzwa ekhuluma ngento le engiyifunayo.

Isiphathamandla sebandla leMDCT umnumnzana Solomon Chikowero, uthi phakathi kwababili abahamba phambili emncintiswaneni wesikhundla sikamongameli umnumnzana Chamisa lomnumnzana Mnangagwa, kunengi okuzakhangelwa ngabavoti nxa sebekhetha.

After uMnangagwa engena kusikhundla, ama socio-economic lines have gone up, ukudla kuyadula izinto ziyadula eZimbabwe. The good thing uChamisa is not in power, kabusanga manje. Akabusi so you cannot judge him on that one. So abantu bazomjaja ngamapromises akhe.

Ziphose zifike amakhulu amathathu (270) izikhundla ezizakhethelwa abantu edale lephalamende. Phakathi kwazo, ezedlula amakhulu amabili (210) ngezabameli bedadle lephalamende abazavotelwa ngelanga lokhetho, besekusithi eziseleyo ezingamatshumi ayisithupha (60) zigcinelwe amalunga edale lephalamende owesifazana kodwa amabandla azakwabelana lezi zikhundla kusiya ngokuthi ibandla lithole amavoti amanengi kangakanani ekhethweni.
Intathelizindaba yeZimbabwe uMxolisi Ncube uthi kuqakathekile ukuthi abantu babheke amaphutha abesenziwa ngumeli wedale lephalamende abebemkhethile ukuze bengenzi iphutha elifanayo lalonyaka.

O MP esesibe labo ngabantu labana abangena ngoba befuna imali, ngoba befuna izimota ezithile kuhulumende, hayi abantu abathunywe ngabantu ngoba kukalutshwana ukuthi uthole uMP ehlangene labantu phakathi kwesikhathi ezothatha izikhalazo zabo kumbe ezobabikela ukuthi kulokho abamthume khona yikuphi asekwenzile kumbe yikuphe asecabanga ukuthi kungenziwa phakathi komphakathi.
Izikhundla zama Senator zonke sezihlangene zingamatshumi ayisitshiyagalombili (80). Kuleli nani ezingamatshumi ayisithupha zizavotelwa ezabelweni (provinces) ezilitshumi zelizwe. Kweziseleyo, ezilitshumi lasitshiyagalombili (18) ngezeZinduna bese kusithi ezimbili zibe ngezabagogekileyo.
Kukhetho lwamakhansili iWard ngayinye kuzafuze ivotele ukhansila wayo okwenza kuqakatheke ukuthi ngaleli langa wonke umuntu evotele ewardini yakhe.
Selokhu iZimbabwe yathola uzibuse isiqhube ukhetho lukamongameli kane kantike obelokhu enqoba ngowayengumongameli umnumnzana Robert Mugabe lobanje ngo 2008 kwaba lobufakazi bokuthi owayengumkhokheli weMDCT umnumnzana Morgan Tsvangirai nguye owanqobayo kodwa waqilibezelwa.
Ukhetho lwabameli bedadle lephalamende lona seluqhutshwe kahlanu kanti sikhathi sonke iZanu pf yiyo ebinqoba. Ngenxake yokuthi minyaka yonke iZanu pf ibisetheswa umlandu wokuqilibezela kulolukhetho, isiphathamandla sebandla leZAPU umnumnzana Future Msebele uthi abazoqapha ukhetho kuzafuze basebenze gadalala.
Ama observers kungaba kuhle ukuthi afike 3 months before ama elections ukuthi abone ukulungiselelwa kwama elections ukuthi kuba njani. Abekhona almost all polling stations if possible. Abekhona lapho amaballot box ahlanganiswa khona lapho okwenziwa khona i verification up to uku announswa kwama results.
Njengobake kuyiwa kulolukhetho omaqhuzo balo iZanu pf leMDCT zombili zidabuke phakathi, abasiki bebunda bathi akukacaci lapho okuzawela khona induku loxakuxaku.

please wait

No media source currently available

0:00 0:04:32 0:00

Facebook Forum

XS
SM
MD
LG