Ukwethulwa kwebhuku elilotshwe ngumsekeli kamgcinisihlalo weMovement for Democratic Change (MDC) uMnu. Tendai Biti encedisana lowake waba ngumholi wakwele Nigeria uMnu. Olusegun Obasanjo kuphazamisekile kancane ngoLwesine ngemva kokuhluthunwa kwezinye izingwalo ngabacuphi bakahulumende, kumbe amaCIO eRobert Mugabe International Airport, eHarare.
Lokhu ngokwesibili ukuthi ugwalo lukaBiti lolu, olulesihloko esithi ‘Democracy Works: Turning Politics To Africa’s Advantage’ luhluthunwe nguhulumende ngezizatho ezingaziwayo.
AmaCIO ahluthune amabhokisi abelogwalo lolu njalo kumaviki ambalwa edluleyo evela kwele South Africa.
Izingwalo azithethe ngoLwesine ngebezizaphiwa abantu abaze ekwethulweni kwebhuku leli emkhosini oqhutshelwe eHarare.
Ibhuku leli lalotshwa nguBiti encedisana loOlusegun Obasanjo yena owake waba nguMongameli weleNigeria, uMnu. Gregg Mills kanye loMnu. Jefferry Herbst.
UObasanjo uchothoze okwenzakale ngoLwesine waxolisa kuzulu oze emkhosini wokwethula lolugwalo.
Uthe, “Besicela uxolo ngokuphuza esikwenzileyo kodwa okwenzakeleyo kuphezulu kwamandla ethu. Bekuyisifiso sethu ukuba lonke lithole ugwalo lolu. Kodwa asikwazi ukuthi pho lonke lizenelisa na ukuthola ithuba lokubala lolugwalo. Siyaxolisa akwenelisekanga ukuthi sibelamabhuku la.”
UBiti uchasise okuqukethwe lugwalo lolu esithi lukhuthaza umbuso okhululekileyo, iDemocracy, njengokutsho kwesihloko salo.
“Wenza imnotho yelizwe ithuthuke ngokuvuleka kwawo kumuntu wonke. Ngokuvula imisika ukwenzela ukuthi isebenze kakuhle kodwa siyananzelela ukuthi ukuvuleka kwale imisika akupheleli khonapho, kufanele uzulu laye achelese. Kodwa eZimbabwe akukho njalo. Sile Command Economy, iCommand Agriculture isiginye imali efika 4 billion kodwa akula lutho olubambekayo kiyo.”
Abalwela amaungelo oluntu abafana loMnu. Charles Nyoni labo basole uhulumende besithi uveze sobala ukuthi akulambuso okhululekileyo eZimbabwe.
UNyoni uthi umbuso kaMongameli Emmerson Mnangagwa uyafana xathu lokaMnu. Robert Mugabe.
“Isehlakalo esenzakale namuhla kusungulwa ibhuku lika Biti eSAPES Trust kusitshengisa ukuthi uhulumende kaMnangagwa katshiyananga lohulumende kaMugabe njalo ulomona ukwedlula okaMugabe ngoba ukuhluthunwa kwamabhuku nje … ibhuku lokubala lilecala lani, liphazamisani ekuthuthukiseni ilizwe lethu leZimbabwe. Khathesi silezinto eziqakathekileyo kulalokhu,”
Omunye njalo olwela amalungelo oluntu uMnu. Gift Ostallos Siziba uthi ingwalo ezifana lalolu olulotshwe nguBiti labanye bakhe ziqakathekile kakhulu.
“Indaba zeDemocracy ziqakatheke kakhulu ikakhulu endaweni enjenge Zimbabwe ngoba nxa ungakhangela uhlelo lokubhala amabhuku ziyanceda ukwenza sibekwazi ukuthi iDemocracy imi njani njalo besikujayele ukuthi into ehluphayo ngokuthi abantu bevume inguquko yikuthi umuntu uyabe esehlezi kuhle esihlalweni kodwa singabakwazi ukuthi kuyangena omunye, omunye ephume, njalo lokuthi izizukulwane ezizabuya zingabi lenkinga. Kufanele sikujayele ukuthi into lezi zenzakala ngendlela elula,”
Umabhalane kugatsha lukahulumende olubona ngokwethulwa kwemibiko, uMnu. Nick Mangwana, utshele iStudio 7 ukuthi ubephandle kwelizwe ngakho ubengelalwazi olwaneleyo ngesehlakalo lesi.
Umkhokheli weMDC, uMnu NelsonChamisa, laye ubekhona ekwethulweni kwalolugwalo emawofisini enhlanganiso yeSAPES Trust. UBiti labanye bakhe bathe beqeda lumkhosi balubhekisa kwele Malawi ukuyakwethulela uzulu njalo lolugwalo.