Kubikwa ukuthi umongameli wakwele Sudan, uMnu. Omar al-Bashir, usesuswe esikhundleni libutho kulandela ukutshengisela kwabantu emigwaqweni bekhonona ngombuso wakhe wocuku.
Abantu batshengisele emigwaqweni okwenyanga ezintathu besithi uBashir ueyehluleka ukubusa njalo wephula amalungelo kazulu mahlayana.
Intathelizindaba zeAssociated Press leReuters zibika ukuthi uBashir, oleminyaka engamatshumi ayisikhombisa lanhlanu (75) uzatshiyela umbuso wakhe uhulumende ozaphatha intambo okwesikhatshana kungakenziwa ukhetho.
Ukutshiya kwakhe umsebenzi kulandele umbiko wokuthi ibutho bekumele likhulume ngaye langokutshengisela kukazulu. Bekukhangelelwe ukuthi ibutho lizabika ukuthi kalisamsekeli ngakho-ke sokumele asuke esikhundleni.
Abantu abanengi bangene emigwaqweni bethakazelela ukuthi uAl-Bashir usetshiye umsebenzi. Bahambe enkambeni yamasotsha lapho akade behlezi khona okwamalanga ayisithupha besithi kumele bancediswe ukumsusa esikhundleni.
Ibutho lakhuza amapholisa ukuthi angadubuli labo ababetshengisela emigwaqweni besola umbuso kaBashir. Kulabantu abangamatshumi amabili lambili ababulawa ngabezomvikela ngesikhathi betshengisela emigwaqweni.
Kulemibiko ethi ibutho seligombolozele isigodlo sikamongameli esisenkambeni yamabutho. Kubikwa njalo ukuthi ibutho selithethe isigodlo sebandla lika al-Bashir.
Kuleminye imibiko ethi ibutho lizakhulula bonke abantu ababotshwa nguhulumende kaBashir.
Ukususwa kuka al-Bashir esikhundleni kunjengokwenzakala eZimbabwe lapho okwasuswa embusweni uMugabe.
Abantu baqalisa ukutshengisela kwele Sudan nyakenye ngoMpalakazi besithi uAl-Bashir uyehluleka ukubusa njalo wephula ilungelo likazulu mahlayana. Babesithi sokukhuphuke intengo yamafutha ezimota, ukudla lokunye okufunwa nguzulu nsukuzonke.
UAl-Bashir wahluthuna intambo zombuso ngomnyaka ka1989 wethula umthetho wokubopha bonke abantu ababephikisa umbuso wakhe kodwa konke lokhu kwehlula. Uhulumende wakhe wabulala abantu abafika amatshumi ayisithupha ababengafuni umbuso wakhe.
UBashir udingwa yinkantolo yeInternational Criminal Court ethi wephula amalungelo abantu esabelweni seDarfur lapho okwabulawa abantu abanengi.