amalinks wokungena

Breaking News

Abongi Bathi Kabakaziswa Okusemthethweni Ngokuxotshwa Kwabo Umsebenzi


Abongi elizweni jikelele okugoqela abakoBulawayo lokhe beqhubekela phambili ngokukhalala umsebenzi loba umsekeli kamongameli welizwe uRetired General Constantino Chiwenga ebaxotshe umsebenzi ngoLwesibili.

Abongi laba bathi basalinde ukuthi baziswe ngokusemthethweni ukuthi ngempela sebexotshiwe umsebenzi ngoba lokhe bekuzwela ezindabeni.

Abongi baqale ukukhalala umsebenzi ngoMvulo bekhonona ngeholo eliphansi kanye lokusilela kwempahla yokusebenzisa ezibhedlela.

Unobhala jikelele wenhlanganiso yabongi eye Zimbabwe Nurses Association (ZINA), uMnumzana Enock Dongo, uthi umbiko wokuxotshwa kwabo bawuthole ezindabeni abakaziswa ngokusemthethweni.

Udokotela wesibhedlela seMpilo Hospital, uMnu. Solwayo Ngwenya, uthi umumo lokhe umubi esibhedlela lesi.

Uthe abongi lokhe bengakaphenduki emsebenzini.

Umongi okhethe ukuzibiza ngokuthi nguNigel Dube uthe sebezwile ukuthi uhulumende ubaxotshile umsebenzi kodwa bananzelela ukuthi ubukhokheli babo lenengi labantu alithakazeleli indlela uhulumende akhetha ukuphatha ngayo udaba lwabo.

Olwela amalungelo oluntu, uNkosikazi Sichasisile Ndlovu, uthi kuyadanisa ukuthi abakhokheli belizwe abahloniphi ukukhululeka koluntu kanye lamalungelo amunyethwe yisisekelo sombuso.

Isakhamuzi sakoBulawayo, uMnu. Mbuso Bhebhe, uthe uhulumende uveza ungcindezelo kanye lokwehluleka okwedlulisileyo.

Uzulu weZimbabwe uveza ukudana lokumangala okukhulu enkundleni zokukhulumisana lokuzilibazisa ezebulenjini ngenyathelo elithethwe nguChiwenga elokuxotsha abongi umsebenzi. Inengi likazulu lithi lokhu kuveza uchuku lombuso webutho ongela zwelo ebantwini abalezikhalazo okumele zilungisiswe hatshi ukuhlukunyezwa ngoba beveze imibono yabo ngokukhalala umsebenzi.

Udaba Esilethulelwe NguBathulile Masuku
please wait

No media source currently available

0:00 0:03:19 0:00

Facebook Forum

XS
SM
MD
LG