Amazwi kaMnu. Robert Mugabe awokuthi umbhuqazwe we Gukurahundi waqala ngenxa yokufihla izikhali emapulazini okwenziwa libandla le PF Zapu ngeminyaka yabo 1980 kusolwa ngabanengi.
UMugabe utshele intathelizindaba ngeviki edluleyo ukuthi yena engasolwa lebandla leZanu PF kudaba lwe Gukurahundi ngoba iZapu yiyo eyabangela ukuthi athumele amasotsha abulala abantu abacatshangelwa ukuthi bayedlula inkulungwane ezingamatshumi amabili ngenxa yokufihla izikhali kwebandla leli.
Kodwa ngesikhathi kusenzakala lokhu kwaba lobufakazi bokuthi ezinye izikhali zazigqitshelwe ngamabutho kaMugabe edinga isizatho sokuhlasela isigaba seMatabeleland leNkabazwe.
UMongameli Emmerson Mnangagwa laye useke wabuzwa ukuthi uzaxolisa na ngodaba lwe Gukurahundi kodwa wala.
UMugabe unxuse intathelizindaba emuzini wakhe ngeviki edluleyo esithi wasuswa esihlalweni okungekho emthethweni.
Intathelizindaba yikho lapho ezimbuze ngodaba lwe Gukurahundi wazigeza izandla esithi ibandla leZapu yilo okumelwe lisolwe. Sixoxe lowalwa impi yenkululeko ekuviyo lezipra, uMnu. Maxa mkandla ukuze sizwe imbono yakhe ngaloludaba.
“Lokho yikuhuluma komuntu oselahlekelwa yimbono, umuntu olahlekelwa zingqondo … Yimihlolo leyi ayikhulumayo,” kutsho uMkandla.
UMkandla uthi kuyamangalisa ngoba emnyakeni edluleyo wathi lokhu kungaphindwa ngoba kwakuyisikhathi sokuhlanya ekhuluma njengomuntu oxolisayo kodwa nangu esesiza esekhulile evula amanxeba.
“Izikhali wazithatha wahlanyela ama dissident awakhe yena. Yikho okwabangela ukuthi abantu bebhuqwe kangaka. Yikho ke leli liphutha lakhe uMugabe lelo. Besimkhangela njengomuntu esimhloniphayo ngoba esekhulile kodwa lokhu kutshengisa ukuthi angeke ahambe ezitaladeni ekhululekile,” kutsho uMkandla.
