Abantu kwele Melika kabalandaba kangako ngokwenzakala kuzwekazi leAfrica ngesikhathi bedinga abazamvotela kukhetho oluzaqhutshwa ngoLwezi lonyaka. Kodwa abacubungula ezombusazwe bathi ozanqoba kukhetho oluzayo ulakho ukusebenza nzima ekwethuleni okufiswa ngele Melika kuzwekazi leAfrica elithuthuka okwamagama njalo elilabantu abedlula kancane ibhiliyoni – 1,2 billion.
Izwekazi leAfrica kalizimelanga lodwa. Lilembali ejulileyo, okunengi okwenjiwayo njalo lamasiko atshiyeneyo. Loba libhekane lobunzima izwekazi leli njalo lingatsho lutho kwabanye abantu kwele Melika, ozanqoba kukhetho oluzayo phakathi kuka Mongameli Joe Biden okubandla lama Democrats lowayengumongameli uMnu. Donald Trump okubandla lama Republicans kuzamele abelenhlelo ezicacileyo ezokudlelana lezwekazi leAfrica.
Ingcwethi zithi uTrump wayedlelana kubi lezwekazi leli alithuka ngamazwi angeke akhulunywa emphakathini. UMichael Walsh ngomunye wabacubungula ezombuswazwe ekunhlanganiso yeForeign Policy Research Institute.
“Wasebenzisa inhlamba engakhulumekiyo esethula amazwi akhe ngezwekazi leAfrica. Wazama njalo ukuba lenhlelo ezazikhangelane lezomvikela lokunye okuphuthumayo ezama ukukuvimba. Kodwa kulutshwana kakhulu ayefuna kwenziwe.”
UBiden yena uzama ukuba eleMelika lidlelana kahle lezwekazi leAfrica lobanje konke lokhu kuqanjulwe yimizamo yakhe yokulwisana leleRussia ukuba lingaxhili impande kuzwekazi leli ngapha esekela eleIsrael elihlasela eGaza. UCameron Hudson ukunhlanganiso yeCcenter for Strategic and International Studies.
“Ngibona engani abantu kuzwekazi leAfrica bakhangele okunengi okugoqela impi kuzwekazi leMiddle East, eGaza, okwenziwa ngele Melika kwele Israel lemizamo yokuvimba ukuba izwekazi leli lingadlelani leleRussia. Ngibona engani bayakusola kakhulu okwenziwa nguhulumende kaBiden emhlabeni wonke jikelele. Lokhu kwenza eleMelika lingabi labangane abanengi kuzwekazi leAfrica.”
Lokhu ngokunye okwavezwa ngele South Africa elathi eleIsrael lephula isinqumo sokuvikela uzulu ese-United Nations Genocide Convention lacina liphanyeka udaba lolu emthethwandaba omkhulu wenhlanganiso le. Uhulumende kaBiden wakulabhulela khatshana lokhu ebuzwa ngakho ngumsakazo weVOA. UMirette Mabrouk yingwethi kokwenzakala eGibhite ekuhlangothi lwe-Horn of Africa kunhlanganiso yeMiddle East Institute. Ingcwethi zithi ukungethembeki kwele Melika ngalokhu elikwenza kuzwekazi leAfrica yikho okudala konke lokhu. UMirrette Mabrouk ngomunye wabalombono lo.
“Kumele ubelokuthembeka ngoba kuzafika esinye isikhathi lapho omunye umuntu ozabuya angene athi kalabandlululo. Umuntu lo uzakuthi kalandaba lokwephulwa kwelungelo loluntu emhlabeni wonke jikelele, ngakho-ke lokhu kuzakwenza ngizizwe sengingcono.”
UHudson uthi umongameli omutsha wakwele Melika uzabhekana lokunengi okuhluphayo lokuqakathekiswa lizwekazi leAfrica.
“Ngibona engani umongameli omutsha uzabhekana lokunengi ngesikhathi lisiyaphansi izinga lokudlelana kwele Melika lezwekazi leAfrica njalo lokufiswa yizwekazi leAfrica okuhambelana lamalungelo lokunye okufunwa ngabantu abakhuluma lizwi linye.”
Zinengi indlela abangakuguqula lokhu okugoqela okunye abangakwenzi kahle. Ababili laba bake bathuma amakhosikazi abo kwele Kenya, Namibia, eGibhite, leMalawi. UBiden wake wathuma umsekeli wakhe uNkosikazi Kamala Harris kwele Ghana. Kodwa ababili laba kabakaze behambe kuzwekazi leAfrica.
Udaba lolu lulotshwe nguAnita Powell
Forum