amalinks wokungena

Breaking News

Priscilla Chigumba: Asivunyelwa Ukufaka Imifanekiso Yabantu Kugwalo Lwe Voters' Roll


UNkosikazi Priscilla Chigumba.

Umgcinisihlalo wekhomishini ebona ngezokhetho eye Zimbabwe Electoral Commission (ZEC), uNkosikazi Priscilla Chigumba, uthi ugwalo lwabalelungelo lokuvota olwe Voters Roll asebalukhiphayo yilo oluzasetshenziswa kukhetho oluzayo loba lungela mifanekiso yabantu ngoba.

Lokhu kuphume emhlanganweni owenziwa ngoMvulo maviki wonke ngabekhomishini le labezindaba ukhetho luze luqhutshwe.

UNkosikazi Chigumba uthe amalunga awekhomishini yeZEC axwayiswe ukuthi bengakhipha imifanekiso yamagama akuVoters Roll bayabe besephula umthetho lamalungelo oluntu.

“Asivunyelwa ukukhipha imfanekiso yabazavota kukhetho lwalonyaka. Njenge ngxenye yokhetho sahlala phansi sadinga amazwe angabe akwenza saswela. Besike sathi sizakhipha konke lemifanekiso kodwa saziswe ukuthi kasivuyelwa ukuveza imifanekiso le.”

Okhokhela inhlanganiso elizimeleyo elibona ngezokhetho ele Election Resource Centre (ERC), uMnu. Tawanda Chiminhi, uthi loba kunjalo, iVoters Roll yalonyaka kumele ihlolwe ngamalunga awe nhlanganiso yamazwe womhlaba kanye labanye abazimeleyo ikakhulu kukhangelwa impumela lokukhonona okwaba khona kukhetho luka 2013 loluka 2008.

“Ugwalo olweVoters Roll lwalonyaka olukhitshwe yiZEC kufuze luhlolwe. Thina sizakwenza lokhu njalo ngibona lokhu bekuyaba ngcono ngabe iZEC iphinde yasinika ugwalo lolu lungakahlolwa sikhangele inguquko abayenzileyo. Sizahlola sikhangele okufana lokuthi lilotshwe njani njalo kungathatha isikhathi.”

Ingcwethi ecubungula ezombusazwe, uMnu. Richard Mahomva, uthe uChigumba wenze kahle ngokubeka bhadla udaba lweVoters Roll lolu njalo lokhu kukhomba ukuthi amalungiselelo wokhetho ahubekela phambili kuhle.

“Umbiko owethulwe yiZEC ukhomba ukuthi amalungiselelo wokhetho aqhubekela phambili kuhle. Nxa kulokunye okudingakala ukuthi kulungisiswe kuzalungisiswa kodwa ngibona inyathelo leli elithethwe ngumgcinisihlalo weZEC liqakathekile ekuthini liveza isifiso sikazulu esokukhetha inkokhokheli entsha singabuyiselwa emuva ngabazama ukumisa ukhetho.”

Isikhulumeli seCentre for Community Development Initiatives in Zimbabwe (CCDIZ), uMnu. Leopold Munhende, uthe impendulo yeZEC iyazwisiseka njengoba imifanekiso yabantu ingabafaka engozini ngamanye amalunga amabandla ezombusazwe.

“Isivumelwano esenziwe yiZEC eyokungafaki amapikitsha kukhasi leli elizahlolwa ngabanye siyasithakazelela ngoba lapha eZimbabwe siyakwazi ukuthi kulamalunga amanye amabandla awezombusazwe angacina sedinga laba bantu ebethusela kumbe ebatshaya. Abanye singababona sebekhonona kodwa lokhu kungabe kuyi politiki kuphela.”

UChigumba ogqibe umhlangano lentthelizindaba wanamhla ngokuxwayisa amabandla ezombusazwe ukuthi engaphatheki loba ukutshotshozela udlakela lwezombusazwe ngemva kokudubuka okwenzakale emhlanganweni wokukhankasa oweZANU PF enkundleni eyeWhite City Stadium koBulawayo ngoMgqibelo.

Facebook Forum

XS
SM
MD
LG