Abesifazane abavela emabandleni atshiyeneyo babuthene koBulawayo izolo beduduza omunye wabo, uNkosazana Thokozani Khupe ophakathi kokudosnelana amandla okukhokhela ibandla leMDC-T loMnu. Nelson Chamisa.
Omama laba bebethe gwaqa enkundleni ye ZITF lapho okutshumayele khona umfundisi Sinjoki.
Abanye kade bekhona nguMongameli wePDP unkosikazi Lucia Matibenga, olilunga ledale lephalamende unkosikazi Priscilla Misihairambwi Mushonga, olilunga ledale lephalamende engowebandla le MDC ekhokhelwa nguMnu. Welshman Ncube kunyelowesiliza oyedwa omela iNkayi edale lephalamende uMnu. Abednico Bhebhe labanye abesifazane abavela emabandleni ehlukeneyo.
Oqoqe lumhlangano ngunkosikazi Lorraine Ncube, uthi lumhlangano uwenze elenjongo yokuthi omama batshengisele ukusekela uMaKhuphe ngenxa yokuthi omama bebethule bengazwakali ukuthi bathini ngokukhahlanyezwa kukaMaKhuphe.
Unkosikazi Priscilla Misiharambwi- Mushonga uthi bafuna ukucitsha udaba lokuthi omama abasekelani ethi kungamanga lokhu. Uthe omama bagwenxwa ngamadoda kucine kukhanya engathi omama abazwani.
Unkosikazi Mushonga ugcizelele wathi omama nxa sebesiya ekhethweni kumele batshengisele ngokungaqgoki izambatho zangasese ukuze bazikhumbuze ukuthi bangabomama bengavoteli amadoda.
Umongameli wePDP unkosikazi Lucia Matibenga uthe ilanga leli beliqakathekile ngoba bebezomqinisa uMaKhuphe njalo angatshedeli emuva ethi njalo imbokodo engumama isithintiwe ngakho impi isiqalile.
Osekela uMaKhuphe unkosikazi Patricia Tshabalala uthe uyamsekel uMaKhuphe laloba kutheni.
Unkosikazi Petronella Nyathi uthi usekela uMakhuphe ngoba elandela isisekelo sebandla leMDC njalo engumama
Osekela uMaKhuphe umnumzana Abednico Bhebhe uthi yena uyamsekela uMaKhuphe ethi ilizwe leZimbabwe lisalele kakhulu emcabangweni.
Unkosikazi Thokozani Khuphe uthe ubonga njalo ujabula kakhulu omama abatshengisele ukumsekela.
Unkosikazi Khuphe kunye labalandeli bakhe baxotshwa ebandleni leMDC njalo khathesi uyakhankasa eluhlangothi lweMDC –T oluzimeleyo.
