Abenhlanganiso yabodokotela abasanda kuphutsha izifunda esanda kubunjwa eyeProgressive Doctors Association of Zimbabwe (PADZ) bathi kabakabhalisi ukuthi basebenze kwele Zimbabwe.
Inhlanganiso yezisebenzi eyeZimbabwe Congress of Trade Unions (ZCTU) bebevele sebethe nxa bengabhalisanga, kuzabanzima ukuthi bakhulumisane lomqhatshi ikakhulu edabeni lweholo.
Umkhokheli wenhlanganiso yabodokotela eyePDZA, uDokotela Benson Dandira, uthi lanxa inhlanganiso yakhe ingakabhalisi ngokusemthethweni, benza lokhu khonamanje ukuze banelise ukuxoxisana lomqhatshi.
Unobhala wenhlanganiso yeZCTU, uMnu. Japhet Moyo, uthi inhlanganiso uhulumende angaxoxisana layo eyaziwayo ukuthi ngeyabodokotela asebaxotshwa umsebenzi ngeye Zimbabwe Hospital Doctors’ Association lanxa uhulumende esithi akasafuni ukuxoxisana labantu asebaxotshwa umsebenzi.
Umkhokheli weZimbabwe Hospital Doctors’ Association, uDokotela Tapiwa Mungofa, uthi ukubunjwa kwenhlanganiso yePDZA liqhinga likahulumende elokuxabanisa odokotela.
uDokotela Mungofa uthi kodwa leliqhinga alisoze laletha inguquko kulokho abakhala ngakho.
Ingcwethi ekucubungula ezombusazwe, uMnu. Tjenesani Ntungakwa, uthi kulesandla sikahulumende ekubunjweni kwenhlanganiso yePDZA.
Abenhlanganiso yeZHDA bathi sebekhona asebabuyela emsebenzini ngemva kokungenela kwabohlangothi olubona ngezempilakahle lwe Higher Life lona oluyingxenye yenkampani kamakhalekhukhwini eyeECONET.
