amalinks wokungena

Breaking News

Inhlanganiso Zababalisi: Kayincedi Lutho i-Cost of Living Adjustment Allowance


Abenhlanganiso yababalisi eyeAmalagamated Rural Teachers Union of Zimbabwe-ARTUZ.

Uhulumende ukhuthazwa ukuba alungisise udaba lweholo lezisebenzi zakhe hatshi ukube lokhe eziqila ngokuzinikeza imali ze “Cost of living adjustment allowance.” Izisebenzi zithi lokhu akusoze kwaqeda udubo lweholo kanye lokufuthelana okukhona phakathi kwazo lomqatshi.

Lokhu kuvezwe yiziphathamandla zenhlanganiso ezimela ababalisi elizweni. Umsekeli womkhokheli weProgressive Teachers’ Union, uNkosikazi Nokuthula Hlabangana – Mpofu, uthi kayitsho lutho i-Cost Of Living Allowance.

“Indaba yonaleyi eye Cost of Living Adjustment, siyizwa emaphepheni, siyizwa ku social media. Khonokho kutshengisela ukuthi uGovernment or uEmployer uyadelela ngoba kumele eqale ku-leadership eyama Union eyiyo emela ababalisi, sibancwebe indlebe sithi hayi, sesicabange ukwenza lokhu, lokhu, lokhu. Kodwa bona bagijimela emaphepheni, bagijimela ku social media. Thina esikufunayo yi salary, i salary ethengayo, isalary elingana le USD$520.”

Kwagcizelelwa yisikhulumeli senhlanganiso yeAmalagamated Rural Teachers Union of Zimbabwe – ARTUZ umnumzana Nation Mudzitirwa.

“Uhulumende kumele aholise ababalisi imali eyanelayo ukwenzela ukuthi alondoloze i Education System ukwenzela ukuthi impilo yabantwana ezikolweni ibe ngcono, i future yabantwana ibe ngcono, abantwana bafunde ezikolweni. Indaba yeholo kumele ilungiswe masinya ukwenzela ukuthi i education system elizweni, ibe safe.”

Umkhokheli wenhlanganiso yeZimbabwe Teachers Association – ZIMTA uMnu. Sifiso Ndlovu uthi ababalisi babatshele ukuba kabanelisi ukuya emsebenzini ngoba bengela mali.

“Osekumele ukuthi yena uhulumende azame ukuthi athuthukise iholo lababalisi, abancedise babuyele emsebenzini. Ngendlela enjalo ke sifuna uhulumende aqhubekele phambili esenza okunje ngalokho okuzancedisa okwezempilakahle yababalisi, lokuzancedisa kanye abafundi kanye ke lokuthuthukisa iholo lezisebenzi zakhe.”

Isikhulumeli senhlanganiso yomanyano weCrisis in Zimbabwe Coalition – CiZC umnumzana Marvelous Khumalo uthi uzulu ukhathazekile ngalokho okwenzakalayo efuna lulungisiswe ngokuphangisa udaba lweholo lezisebenzi zikahulumende.

“Uhulumende wethu seyehlulekile ukulungisa udaba lwababalisi. Seyehluleke ukuvumelana lababalisi, ukuthi izikolo zivulwe njalo bathole izimali zabo lezo abazifunayo besithi bona they are now incapacitated.”

Kodwa umphathintambo wezemali lokuthuthukiswa komnotho u Professor Mthuli Ncube uthi konke kuhamba ngendlela. UNcube uveze lokhu emhlanganweni labahleli bezindaba owenzelwe emahofisini akhe kanye lakundlela yokuxoxisana yakulezi insuku ye ZOOM, wokuhlaziya uhambo asethe waluhamba emsebenzini wokwenza umnotho uhlaliseke phansi kohlelo olwe Transitional Stabilisation Programme – TSP.

“Kwakusiba lesikhathi lapho izisebenzi zikahulumende zazingazi ukuthi zihola nini ngoba sasinganelisi ukukuhlelelela lokho. Akusenjalo khathesi, sesisanelisa ukusebenza ngalokho esilakho njalo izisebenzi zikahulumende sezisanelisa ukuthola iholo lazo lemali zama bonus, ngesikhathi.”

Abenhlanganiso zababalisi bathi iholo lombalisi alithola ngenyanga, eyedlula kancinyane inkulungwane ezine zamadola eZimbabwe (ZW$4,200), liyinhlekisa elizweni lapho okubikwa imhuli yabantu abayisithupha isifuna inkulungwane ezilitshumi lasikhombisa zamadola ZW$17,244 ukuthi yenelise ukuthenga okudingakalayo empilweni ngenyanga.

Facebook Forum

XS
SM
MD
LG