amalinks wokungena

Breaking News

'Isotsha Likazulu' uRetired Lieutenant General Sibusiso Moyo Uyagula 


URetired Lt. General Sibusiso Moyo.

URetired Lieutenant General Sibusiso Moyo, umpathintambo wezobudlelwano beZimbabwe lamanye amazwe, uyelatshwa umkhuhlane ongaziwayo ekilinika yeAvenues Clinic eHarare kulandela ukulaliswa kwakhe kuleyo ndawo ngoLwesithathu.

UMoyo, obizwa ngabantu ngokuthi lisotsha likazulu kulandela ukwethula umbiko wokususa uMnu. Robert Mugabe esikhundleni nyakenye, ubikwa egula okumangalisayo.

Kodwa-ke, uMnu. Energy Mutodi, umsekeli womphathintambo kahulumende obona ngokwethulwa kwemibiko, wethule umbiko ngokwehlele uMoyo kumabonakude esithi wenelisile ukumbona ekilinika yeAvenues Clinic ngoLwesine.

Uthe bekukhangelelwe ukuthi uMoyo uzahlinzwa kancane ngodokotela “njengoba elesifo esingambambanga ngamandla.”

UMutodi uthe uMoyo usesizwa ngcono loba nje kuleminye imibiko ethi usethwalelwe kwesinye isibhedlela phandle kwelizwe.

Umsakazo weStudio7 awenelisanga ukukhulumisana lomphathintambo wezokwethulwa kwemibiko, uNkosikazi Monica Mutsvangwa, lomka Moyo, uNkosikazi Loice Matanda-Moyo, ngesimo sikaMoyo.

UMoyo ubekhangelelwe ukuthi uzahamba loMongameli Emmerson Mnangagwa emhlanganweni wamazwe womhlaba wonke jikelele oweUnited Nations General Assembly owenzelwa eNew York.

UMoyo ubekhangelelwe ukuthi uzaphendlela ilizwe leZimbabwe indlela ezintsha zokudlelana lamanye amazwe.

Nyakenye wethula umbiko oqakathekileyo kulandela okwenziwa libutho leZimbabwe elahluthuna intambo zombuso lisithi lifuna ukususa abantu ababi ababehanqe uMugabe.

Lokhu kwenza ukuthi uMugabe asuke esikhundleni kwathi umkakhe, uNkosikazi Grace Mugabe, waxotshwa kubandla leZanu PF labanye bakhe ababekucele leGeneration 40 kubandla leli.

Abanye babo abagoqela uProfessor Jonathan Moyo loMnu. Patrick Zhuwao, umzukulu kaMugabe, babaleka eZimbabwe besesaba ukubulawa libutho.

Babecatshangelwe ukuthi bafuna ukufaka uNkosikazi Mugabe esikhundleni sikamongameli ngoba wayeseluphele.

Kodwa-ke uMugabe usanda kwethula umbiko othi wayefisa ukuthi uMnu. Sydney Sekeramayi angene esikhundleni sakhe hatshi umkakhe.

Facebook Forum

XS
SM
MD
LG