Igceke leZimbabwe elikhulu lendizamtshina eleHarare International airport namuhla linikezwe igama elitsha liphiwa elikamongameli welizwe ngakhoke selibizwa ngokuthi yiRobert Mugabe international airport into esolwa ngabanengi ikakhulu abamabandla aphikisayo.
Esethula umbiko wakhe ekuvulweni okusemthethweni lelogceke lezindizamtshina, uMongameli Robert Mugabe uveze ukuthi uyathokoza kakhulu ngokuphiwa linhlonipho.
Ekhuluma njalo kulomkhosi, ilunga loluhlu lwabasakhulayo kubandla lweZanu PF, uTongai Kasukuwere, ubike ukuthi lelonyathelo yinto elungileyo ngoba umongameli Mugabe ulembale ebukekayo.
Umphathintambo wezobudlelwano beZimbabwe lamanye amazwe, uMnu. Walter Mzembi, laye ugcizelele wathi akulanto entsha ngokuthi ibizo likamongameli liphiwe igceke lezindizamthsina ethi le yinto etholakala umhlaba wonke jikelele lapho amagama abanye balabo abazakala ngezombangazwe ephiwa izakhiwo eziqakathekileyo.
Laloba kusekelwa ngabakubandla leZanu PF ukunikezwa igama elitsha kwaleli gceke lendizamtshina abanengi bathi ibandla leli lichitha isikhathi emdabeni ezingela lamsebenzi emizameni yokususa amehlo abantu ekuxokozeleni okuphakathi kwalo ngemva kokuxotshwa kobengmsekeli kaMugabe, uMnu. Emmerson Mnangagwa.
Ingcwethi ecubungula ezombusazwe uMnu. Butholezwe Dlamini yena uthi sokusobala ukuthi uMugabe uzithandela Amandla hatshi okunye.
Isakhamuzi sase Harare uMnu. Tshenesani Ntungakwa uthi lokhu kuveza ukuba uMugabe usefuna ukwenza iZimbabwe ilizwe lakhe.
Kusenjalo, isizalwane seMelika uMartha O’Donovan owetheswa icala lokufuna ukugenqula uhulumende kaMongameli Mugabe ngokuloba amagama ameyisayo enkundleni yokukhulumisana lozulu eye Twitter usenikezwe imvumo yokuhlawula isibambso seBail.
Esethula isinqumo lesi, uMahluli uJustice Clemence Phiri ulaye ukuba uOdonovan, inkulungwane eyodwa yamadola - $1,000 ikanti aqhubeke ehlala kukheli ayinikeza kwabezomthetho njalo abambise ugwalo lwakhe lokuhambisa ipassport emthethwandaba.
UO’Donovan ubuye waphiwa isigoqo sokungahluphani labafakazi kanye lokuthi aqhubeke etshitshela emapholiseni awe Harare Criminal Investigation Department Law and Order Division ngoMvulo kanye langoLwesihlanu.