amalinks wokungena

UMugabe Ulakho Ukufikisa Iminyaka Yokuzalwa Engu-98 Elokhe Esesikhundleni

  • Gibbs Dube

UMongameli Robert Mugabe.

Kubikwa ukuthi ibandla leZanu PF lifuna ukuthi uMongameli Robert Mugabe ahlale esikhundleni sakhe aze afikisa iminyaka engamatshumi ayisitshiyagalo lunye lesitshiyangalo mbili (98).

Umbiko owethulwe yinkampani yezindaba eyeReuters uveza ukuthi ibandla leli lilakho ukwenza umhlangano omkhulu owe Extra Ordinary Congress kulokuthi lenze umhlangano weNational People’s Conference.

Kubikwa ukuthi abalandeli bebandla leli bafuna ukuthi bayenika uMugabe isikhathi eside sokuhlala embusweni kulokuthi kukhulunywe ngodaba lolu ngomnyaka ka2019 lapho okuzakwenziwa khona umhlangano weCongress okukhethwa khona inkokheli ezahlala ezikhundleni okweminyaka emine.

Omunye wabakhulume leReuters, okudale lePolitiburo, uthe uMugabe ulakho njalo ukususa ezikhundleni emhlanganweni lo labo abacatshangelwa ukuthi balwisana laye lomkhakhe uGrace Mugabe.

“UMongameli Mugabe nguye yedwa olamandla okubusa. Akula muntu olamandla anjengawakhe kubandla leZanu PF. Lokhu kuzaqiniswa ngoMpalakazi emhlanganweni lo okumele wenziwe.”

Abanye abalandeli bebandla leli abakudale lePolitiburo bethule umbono ofanayo besithi abakwazi ukuthi uMugabe usasusa umsekeli wakhe, uMnu. Emmerson Mnangagwa, osanda kumthathela uhlangothi lukahulumende olubona ngezemithetho kulandela ukuchothozwa kwakhe nguNkosikazi Mugabe lamanye amalunga ebandla leli okuthiwa akucele lebandla leli elibizwa ngokuthi yiGeneration 40.

Icele leli licatshangelwa ukuthi lifuna ukuthi UNkosikazi Mugabe athathe isikhundla sikaMugabe.

UMnangagwa kubikwa ukuthi usebenzisa icele lebandla leZanu PF elibizwa ngokuthi yiTeam Lacoste ukuthi azame ukungena esikhundleni sikaMugabe.

Abazi okwenzakalayo bathi usekelwa ngabanye abalwa impi yenkululeko, amapholisa lebutho lelizwe.

Amanye njalo amalunga edale lePolitburo athe uMugabe ulamandla okuthi engasusa uMnagagwa nxa efuna kodwa kasoze akwenze lokhu ngoba uzabonakala njengomuntu owephula imithetho ebandla lakhe.

Omunye wabo uthe, “UMongameli Mugabe uyananzelela ukuthi ibandla leli selimaqamuqamu ngakho-ke ufisa ukuthi kuyiwe kukhetho oluzayo abantu bonke bebambene. Yikho lokhu okwenze ukuthi kuqoqwe umhlangano weExtra Ordinary Congress ozakwenziwa ngoMpalakazi.”

Inengi labo lithi kabalaqiniso lokuthi uzaxotsha uMnangagwa kumbe hatshi.

UMnangagwa uthi wafakelwa itshefu ngesikhathi esemhlanganweni weZanu PF Youth Interface Rally njengalokho okwehlela umuyi uNkosikazi Shuvai Mahofa edolobheni leVictoria Falls ngomnyaka ka2015.

Facebook Forum

XS
SM
MD
LG