amalinks wokungena

'Kulungile Ukuthi uMugabe Angene Umhlangano weUN'

  • Gibbs Dube

UMongameli Robert Mugabe.

Abasekela ibandla elibusayo bathi kulungile ukuthi uMongameli Robert Mugabe abesemhlanganweni weUnited Nations General Assembly ngoba kunengi okuvunyelwana eNew York yinkokheli yomhlaba emhlanganweni lo.

UMnu. Joseph Tshuma, omele iPhelandaba-Mpopoma kudale lephalamende ekubandla leZanu PF, uthi abantu bathanda ukuchothoza uMugabe loba engenzanga okubi.

Abantu abanengi bayasola njalo ukuthi uMongameli Mugabe uhambe labantu abanengi eNew York emhlanganweni weU.N General Assembly. Kubikwa ukuthi uMugabe uhamba labantu abedlula amatshumi ayisikhombisa abagoqela umkakhe, uNkosikazi Grace Mugabe, bantwana bakhe, umkhwenyana lomzukulu, kodwa uTshuma uthi akwenzakali ukuthi umuntu athole imali engasebenzeli uhulumende.

UTshuma uphinde wathi imali etholwa ngabantu abasebenzela uhulumende abahamba endaweni ezitshiyeneyo seyaphungulwa ngenxa yesimo esibi somnotho elizweni.

Abaphikisa uMugabe bona bathi akumelanga abesemhlanganweni lo ngoba kawuletheli lutho abantu beZimbabwe. Omunye wabo nguMnu. Fortune Mlalazi webandla lePeople’s Democratic Party othi uMugabe ulande ukuthethisa abanye abantu emhlanganweni lo.

UMlalazi uphinde wathi kaboni ukuthi uMugabe uzaphathelani abantu beZimbabwe.

UMongameli Mugabe ujayele ukuthethisa amazwe afakele abanye bebandla leZanu PF izijeziso zenotho esithi lokhu kwenziwa kulandela ukuthathwa komhlabathi wabamhlophe ngabantu abansundu.

Ukhangelelwe ukuthi uzakwethula umbiko wakhe ngoLwesine. UMlalazi uthi uMugabe ulakho njalo ukuthi athethise amazwe entshonalanga lamanye amfakela izijeziso zenotho.

NgoLwesibili ntambama kubonakale uChatunga, umntwana kaMugabe, ethwele impahla ethengwe esitolo seGucci esaziwa ngokuthi silentengo ephakeme. UTshuma uthi uChatunga engabe ethole imali yokuthenga impahla le kuyise.

Uphinde wathi uChatunga wenza njengalokho okungenziwa ngabanye abantwana, kodwa-ke uMlalazi uthi okwenziwe nguChatunga yinhlalayenza emulini yakoMugabe.

Akwaziwa ukuthi uMugabe uzaphathelani izizalwane zeZimbabwe ngesikhathi sebuyela ekhaya. Kulabanye abathi uzabe ephethe izandla kuthi abamsekelayo bathi azabe eselolwazi lokwenza okutshiyeneyo okuhambelana leZimbabwe lamanye amazwe.

Facebook Forum

XS
SM
MD
LG