Uhulumende weZimbabwe uthi kukhangelelwe ukuthi isidumbu sowayengumongameli, umuyi uRobert Mugabe, sizalethwa kwele Zimbabwe ngoLwesithathu angcwatshwe ngeSonto.
Lokhu kulokuxokozela ngokuthi uzabekwa ngaphi.
Umbiko lo wethulwe ngeSonto nguMnu. Isaac Moyo, umqondisi wenhlelo zonke zewofisi kamongameli Emmerson Mnangagwa. UMoyo uthi kukhangelelwe ukuthi umuyi uzabekwa emathuneni eNational Heroes Acre eHarare loba kulemibiko ethi umdeni kaMugabe ufuna ukuthi angcwatshwe koZvimba esabelweni seMashonaland West.
Iphephandaba leSunday Mail libika ukuthi uMnu. Leo Mugabe, umzukulu kaMugabe, uthi akulamuntu owathi umalumakhe engabekwa emathuneni eNational Heroes Acre. Okwamanje uhulumende weZimbabwe usenike uMugabe isicoco seqhawe lesizwe.
Owake wamela iTsholotsho edale leSenate, uMnu. Believe Gaule, uthi bamelele isidumbu sikaMugabe njalo ukhangelelwe ukuthi uzangcwatshwa eHarare hatshi koZvimba.
Kodwa uMnu. George Mkwananzi uthi akuqakathekanga ukuthi umuyi uzabekwa ngaphi ngoba wonela abantu abanengi.
UMfundisi Edson Dube ohlala eTsholotsho uthi abantu abanengi lokhu bezondiswe ngokwenziwa ngumuyi.
Lokhu kusekelwa nguMfundisi Ray Motsi weBaptist Church othi abantu balelungelo lokuthukuthela ngoba umuyi kalungisanga uhlupho lombhuqazwe weGukurahundi.
UMugabe ubhubhele eGleneagles Hospital ngoLwesihlanu. Ubeselesikhathi eselatshwa elizweni leSingapore. Akwaziwa ukuthi ubebulawa yini.
