Abantu abacatshangelwa ukuthi ngamapholisa ensitha kubikwa ukuthi baphose bathumba uMnu. Nelson Chamisa, umkhokheli webandla leMovement for Democratic Change, evela emhlanganweni webandla leli esabelweni seMarondera.
Isikhulumeli sebandla leli, uMnu. Jacob Mafume, utshele umsakazo weStudio 7 ukuthi abantu akade besezimoteni ezine, asebelesikhathi belandela uChamisa, bavimbe izimota ebezithwele uChamisa bazama ukumthumba.
UMafume uthe abavikela uChamisa balwisane labantu laba bathatha uChamisa bamfaka kweyinye imota bavimba akase bebahlasela.
“Laba ngabantu esicabangela ukuthi ngamapholisa ensitha. Sebelesikhathi belandela uChamisa. NgoMgqibelo bazame ukumthumba kodwa akade behamba loChamisa babavimba. Umtshayeli oyedwa uphose wathunjwa kodwa weqa emoteni okulabantu akade sebemthumbile. Ulimele isanda ngoba weqe emoteni le.”
Kasenelisanga ukukhuluma lamapholisa ngodaba lolu loba nje kulomonye umpholisa olesikhundla esiphezulu othe uChamisa umangele emapholiseni.
UChamisa utshele abantu emhlanganweni awenze eMarondera ukuthi uMongameli Emmerson Mnangagwa uzavuma ngekhanda ukuthi weba ukhetho ngoba umnotho usubhidlika okumangalisayo