Amalunga edale leSenate kwele Melika namuhla abuzisisa abamele uMongameli Donald Trump lebandla lama Democrats ngecala eletheswa uTrump elokuthi wayefuna ukusebenzisa ilizwe leUkrainne ukuba angcolise igama likaMnu. Joe Biden, olakho ukuncintisana laye kukhetho oluzakwenziwa lonyaka.
UMahluli omkhulu wakwele Melika nguye ozabe ebala imibuzo yamalunga afisa ukuba kwazi okunengi ngokuthoniswa kwecala eletheswa uTrump elokuthi wamisa uncedo lwezikhali okwakumele zinikwe ilizwe leUkrainne esenzela ukuba iziphathamandla zakulelolizwe zivule athi licala okumele letheswa uMnu. Hunter Biden, umtaka Joe Biden, okuthiwa wayesebenzela inkampani eyayilobukhohlakali obumangalisayo elizweni lelo ephehla umlilo kagetsi.
Abakubandla lama Democrats bafuna ukuthi kube labafakazi abanjengo Mnu. John Bolton, owake wasebenza loTrump, othi umongameli wayefuna ukuba ilizwe leUkrainne limcedise ukukhankasa kukhetho oluzayo ngokungcolisa ibizo lika Joe Biden.
Kulomunye njalo umuntu okuthiwa wayedlelana loTrump, uMnu. Lev Parnas, laye othi uTrump wakwenza lokhu. Kodwa abakubandla lama Republicans bayakuphikisa lokhu besithi ibandla eliphikisayo lifuna ukususa uTrump esikhundleni okungekho emthethweni.
Kukhangelelwe ukuthi kuzavotwa ngoLwesihlanu ukuba kube labafakazi kumbe hatshi ngesikhathi kuthoniswa icala leli.
Ingcwethi kwezombusazwe ezimele yodwa, uMnu. Den Moyo, uthi akukakhanyi ukuba kuzabizwa abafakazi kudaba lolu.
