amalinks wokungena

Breaking News

Sebezajeziswa Kalukhuni Abendisa Abantwana


Intombazana engafuni ukwendiswa.

Uhulumende useveze ukuba usezakwethula umthetho ozasetshenziswa ukujezisa abatshada kumbe ukwendisa abantwana.

Lokhu kuvele emhlanganweni obuqoqwe ukuhlaziya udaba lokwenda kwabontanga owenzelwe eHarare namhla. Intathelizindaba yethu uMavis Gama usethulelwa loludaba ngokugcweleyo.

Okwamanje lumthetho usesekusibanga se draft ezandleni zabogatsha lwezemithetho njalo ukhangelelwe ukuba ungasoze uthathe isikhathi ngoba ingatsha zonke zivumelana ekuthini ube khona.

Lokhu kuza ngemva kokuba uzulu ekhuthaze uhulumende ukuba enze kube lemithetho elukhuni eyokujezisa labo abenza lokhu kuganga kumizamo yokwehlisa inani labantwana abatshadiswayo elibikwa lilokhe liqansa

Umhlangano lo wenzelwe endaweni okuthiwa yi Moto Republic uqoqwe yinhlanganiso ye Real Open Opportunities for Transformation Support ( ROOTS ) besebenzelana labe Girls' Legacy kunye labe Research and Advocacy Unit ( RAU ). Bekulozulu ovele kunhlangothi ezehlukeneyo okubalisa lengatsha zikahulumende.

Kube lokuvumelana ngemva kokubonisana kokungenziwa ukuqhubekisela phambili impi yokulwisana lokwendiswa kwabantwana besesebancinyane ngemva kwesinqumo esenziwe lidale le Constitutional Court.

Ngenyanga edluleyo umahluli uJustice Luke Malaba ukubeke sobala ukuba kungaphandle komthetho ukuvumela umntwana oleminyaka engaphansi kwelitshumi lasitshiyagalombili ukuya emacansini.

Umphathintambo wogatsha olubona ngendaba zokulinganiswa kwamathuba phakathi kwabesilisa labesifazane lokuthuthukiwa kwezabelo, unkosikazi Nyasha Chikwinya ubekhona emele uhulumende.

UChikwinya uthembise uzulu obekulomhlangano ukuba uzokwenza konke okusemandleni akhe ukutshutshisa lindaba.

UChikwinya wengeze ethi isifiso sakhe labanengi yikuba abatholakala belomlandu wokwendiswa kwabantwana besesebancinyane baphiwe isigwebo esilukhuni

Unkosazana Theresa Mugadza oligqwetha ngomunye wabaze kulomhlangano. UMugadza ugcizelele ukuba kungumlandu womuntu wonke ukuba aphatheke kulempi ngendlela ezehlukeneyo ukuluqeda loludubo.

Uthi loludubo lwande kakhulu kubantwana abangamantombazane abendiswa besesebancinyane ngezizatho ezimbalwa.

UMugadza uthi kuyinto ejabulisayo ukuba inkokheli kungatsha zikahulumende isibona ukuqakatheka kokutshutshisa udaba lokubunjwa kwalumthetho.

Kuvunyelenwe njalo ukuba zisebenze gadalala inhlangothi zonke kulempi okubalisa olokholo lwesiKristu kanye labezamasiko esintu.

Uhulumende yena uthi ulethemba lokuba uyabe usukhona lumthetho umnyaka ungakapheli ngoba ukuba khona kwawo kumqoka ekulwisaneni lokwanda kwemitshado yabantwana elizweni.

please wait

No media source currently available

0:00 0:03:29 0:00
Lapho esitholakala khona

XS
SM
MD
LG