Isikhulumeli senhlanganiso ye Zimbabwe Football Association uXolisani Gwesela uthi iqembu lama Warriors liqale namhla amalungiselelo alo awokuyaphatheka kumncintiswano walonyaka owe COSAFA Cup.
“Iqembu lama Warriors elizakuyasimela kumidlalo ye COSAFA selikhethiwe njalo lingena enkambeni namhla ukuze balungiselele ukuba liyedlala ePort Elizabeth kwele South Africa. Abafana bazalungiselela kuze kube mhla zine insuku kunyanga kaNtulikazi kuthi mhla zinhlanu sisukume silubhekise khonale ePort Elizabeth.Sibafisela inhlanhla abafana bakithi njalo silethemba ukuthi bazanqoba,” kutsho uGwesela.
Iqembu le Zimbabwe yilo eseliphakamise inkezo ye COSAFA kanengi kumbali yalumncintiswano njalo ocubungula ezemidlalo uWashington Sibanda uthi kungaba yiyo imbangela eyokuba abaqeqetshi baleliqembu babize abadlali abavele belodumo.
“Abanengi bakhona bekuzakuba kuhle ngabe ngabadlali abadlala kwelakithi kwasekubizwa labanye abangahlali bethola ithuba lokudlala nxa sekudlalwa imncintiswano emikhulu. Imncintiswano efana lowe COSAFA yiyo okumele siyisebenzise ukuba sibone ukuba laba abadlali abadlala ekhaya lalaba abangatholi ithuba lokudlala bami ngaphi ekutheni bengayenelisa yini labo ukuba yingxenye yeqembu nxa sekudlalwa imidlalo eyokudinga amaqembu azakuya dlala kumncintiswano yezizwe zomhlaba,” kutsho uSibanda.
Ikhasi leqembu le Chicken Inn ku Twitter liqale inkulumo ngxoxo ngokufisela inhlanhla abakhethiweyo kuqembu lesizwe njalo abanengi ababeke imbono yabo bebekhonona ngendlela okukhethwa ngayo ngoba kungani abadlali abadlala kuhle kumncintiswano we Chibuku Super Cup benganakwa kodwa kukhethwa abadlali abadlala kwamanye amazwe abangadlaliyo kumaqembu abo.
Umncintiswano walonyaka owe COSAFA ukhangelelwe ukuqala mhla ziyisithupha kunyanga kaNtulikazi usiyafika emaphethelweni mhla zilitshumi lathoba minwe mbili.
Nyakenye lumncintiswano kawuzange ubekhona ngemva kokuba umkhuhlane we Covid – 19 uphazamise inhlelo zemidlalo emhlabeni jikelele.