amalinks wokungena

Breaking News

Abakudale leSenate eMelika Bafuna Kufakelwe Abanye Abalandeli beZanu PF Izijeziso Zenotho


Umgcinisihlalo wekhomithi yeSenate Foreign Relations Committee, uSenator Jim Risch, R-Idaho.
Umgcinisihlalo wekhomithi yeSenate Foreign Relations Committee, uSenator Jim Risch, R-Idaho.

Abakudale leUnited States Senate kukhomithi ebona ngokudlelana lamanye amazwe sebecele uhulumende kaMongameli Donald Trump ukuthi engezelele amabizo asuse lamanye kuluhlu lwabalandeli bebandla leZanu PF abafakelwa izijeziso zenotho besetheswa umlandu wokwephula ilungelo loluntu, ubukhohlakali lokungaqhubi kahle ukhetho.

UMnu. Chris Coons okubandla lama Democrats loMnu. Jim Risch, umgcinisihlalo weSenate Foreign Relations Committee njalo okubandla lama Republicans, bathe kufanele ukuthi usibalukhulu obona ngezemali, uMnu. Steven Mnuchin, loMnu. Mike Pompeo, obona ngokudlelana lamanye amazwe, benze lokhu ngokutshetsha.

Bathi akulanguquko ekhanyayo selokhu kwangena uMongameli Mnangagwa labanye bakhe embusweni ngomnyaka ka2017.

Bethule umbiko lo ngoLwesithathu ebulenjini beInternet kukhasi leUnited States Foreign Relations Committee.

“Uhulumende wakwele Zimbabwe wethula imibiko yamanga esithi izijeziso zenotho yizo ezibhidliza ilizwe loba nje uhulumende wethu enceda eleZimbabwe ngokuqhuba inhlelo ezitshiyeneyo. Ngesimo esiselizweni leZimbabwe phakathi kweminyaka emibili, siyalicela ukuthi lisebenzise konke elilakho okugoqela izijeziso zenotho ezafakelwa abanye abantu ukwenzela ukuguqula izenzo zabanye abenza okungaqondanga.

“Kuluhlu olutsha olweSpecially Designated Nationals and Blocked Persons kumele kube labanye abatsha njalo labanye okumele basuswe kusiya ngokuthi benzeni.”

Bathi kuqakathekile ukuba ilizwe leMelika livezele abantu beZimbabwe iqiniso ngezijeziso zenotho hatshi okwethulwa libandla leZanu PF eliqamba amanga ngalokhu.

URisch loCoons bathi izijeziso lezi zafakelwa abantu abephula ilungelo loluntu, izikhohlakali, abangafuni kube lenguquko kwezombusazwe, abeyisa inhlangothi zikahulumende lezinye ezifuna kube lenguquko elizweni kanye labancindezela uzulu.

Izijeziso lezi zafakelwa abalandeli bebandla leZanu PF ngomnyaka ka2003 kulandela ukukhahlanyezwa kukazulu ngabalandeli bebandla leZanu PF, ukwephulwa kwemithetho njalo lokwehluleka ukuqhuba ukhetho olubalulekileyo.

Owayengumongameli umuyi uRobert Mugabe wayetshela abantu ukuthi izijeziso lezi yizo ezibhidliza umnotho weZimbabwe. Lokhu yikho okusemlonyeni kaMnangagwa osecele umanyano weSouthern African Development Community ukuthi umsekele ekulwisaneni lezijeziso lezi.

Kasenelisanga ukukhuluma ngodaba lolu leziphathamandla zikahulumende wakwele Zimbabwe.

XS
SM
MD
LG