amalinks wokungena

Breaking News

Seziphendukile Enkundleni Ezemidlalo KweleZimbabwe


Egypt Africa Cup Soccer

Abezemidlalo sebeyamukele ngentokozo enkulu isinqumo esithethwe nguhulumende ukuba abemidlalo sebengaphindela ezinkundleni lasendaweni ezehlukeneyo zokulibazisa uzulu.

Bathabe bamanzi te abakuhlangothi lwezemidlalo ngemva kokuba inhlanganiso elawula ukuqhutshwa kwezemidlalo elizweni eye Sport and Recreation Commission yethule umbiko othi sebengaqala njalo inhlelo zabo.

Umqeqetshi womdlalo we Taekwondo njalo engumqondisi weqembu le Panthers Taekwondo Club uVusumuzi Ncube wamukele ngenjabulo enkulu ukuphenduka kwezemidlalo.

“Indaba yokuphenduka kwezemidlalo iyathokozisa kakhulu kubadlali. Ungakhangela njalo bakhona abakade bevele beqhatshwe kuhlangothi lwezemidlalo okokuthi ungakucabanga ukuthi izimuli zabo zisesimeni bani ngemva kweminyaka phose emibili kungela ezemidlalo uzakunanzelela ukuba isimo lesi besihlukumeza abantu.

Okwakhathesi sesizazilolonga sesikhululekile ngoba lokhu sekutshengisa ukuba sesingaphila lakho uyabona. Kulemidlalo yama AUSC (African Union Sports Council) esesijabulela ukuba sesingawalungiselela sithokozile nxa sikhangela khonapho ngoLwezi.

Siyambonga uhulumende ngokusipha imvumo eyokuqhuba inhlelo zethu kodwa kumele sihlale sizivikele ngaso sonke isikhathi,” kutsho uNcube.

Ezemidlalo zimiswe ngoMbimbitho nyakenye ngemva kokuba sekutholakale ukuba umkhuhlane we Covid – 19 usumemetheke wagcwala umhlaba wonke.

Bakhona abake baphiwa imvumo eyokuba beqhube inhlelo ezithile ikakhulu amaqembu amela ilizwe kodwa inengi labezemidlalo bebengavunyelwa ukuqhuba inhlelo zabo.

Olilunga lenhlanganiso yabaqeqetshi eye Zimbabwe Soccer Coaches Association ko Bulawayo uMorris Mukwiti uthi imithandazo yabo isize yezwakala.

“Lokhu kuhle kakhulu. Siyakuthakazelela ukuphenduka kwemidlalo yonke egoqela lowenguqu. Siyabonga kakhulu besesile sikhathi eside silokhu silindele,” kutsho uMukwiti.

Loba nje ezemidlalo sezivunyelwa, labo abafuna ukuqhuba imncintiswano kumele bathole imvumo evela kunhlanganiso ye SRC njalo lalapho bezilolonga kumele belandele imilayo yenhlanganiso ye World Health Organisation eyokuzivikela emkhuhlaneni we Covid – 19.

Abezemidlalo bayakhuthazwa njalo ukuba labo abaleminyaka engaphezu kwetshumi lane abaphatheka kwezemidlalo kumele babe behlabe ijekiseni eyokuvikela umkhuhlane we Covid – 19 kuthi labo abangakafikisi leyo minyaka behlohlwe ukuba kabala zitshengiselo ezokuba lomkhuhlane yini.

Abenhlanganiso ye SRC kanye lamapholisa kahulumende kubikwa bezabe bebhoda behlola ukuba ezemidlalo ziqhutshelwa endaweni ezivikelekileyo emkhuhlaneni we Covid – 19 njalo labo abazatholaka besephula umthetho bazajeziswa.

Facebook Forum

XS
SM
MD
LG