amalinks wokungena

Breaking News

USibusiso Moyo Uthi Uhulumende Ulelungelo Lokuvimba Amalunga Ebandla leMDC Atshengisela Emigwaqweni


FILE: URetired Major General Sibusiso Moyo, Harare, Zimbabwe, Nov. 15, 2017.

UMnu. Sibusiso Moyo, umphathintambo kahulumende welizwe leZimbabwe obona ngokudlelana lamanye amazwe, uthi kulungile okwenziwa nguhulumende ovimba ukutshengisela emigwaqweni okwenziwa ngamalunga ebandla leMovement for Democratic Change (MDC) elikhokhelwa nguMnu. Nelson Chamisa.

UMoyo uthi loba abantu eZimbabwe belelungelo lokutshengisela emigwaqweni, kwesinye isikhathi kulabanye abakhuthaza udlame.

Ngakho-ke uthi uhulumende usemise ukutshengisela emadolobheni amanengi obekumele kwenziwe libandla leMDC esenzela ukuvikela abantu lamabhizimusi.

“Ukutshengisela kuvunyelwe kusisekelo sombuso welizwe. Wonke umuntu uyavunyelwa ukuthi atshengisele. Kodwa kumele utshengisele ngendlela engasoze ikhahlameze abanye abantu. Kumele njalo utshengisele ulandela umthetho welizwe. Okwenzakala yikuthi bacela ukuthi batshengisele emigwaqweni. Ababekucela kwakuveza ukuthi bafuna ukuguqula ezombusazwe okuyinto eyenziwa ngesikhathi sokhetho.

“Loba kunjalo kwakulilungelo labo. Kodwa-ke uhulumende wananzelela ukuthi inhlonso yabo yayingeyokwenza kubelodlakela elizweni. Kunengi ababekhuluma ngakho njalo abanye babekhankasela ukuthi kubelodlakela.”

UMoyo utshele umsakazo weVoice of America ukuthi kumele abantu babekezele ngesikhathi uhulumende ezama ukuguqula umnotho welizwe osugugeke okumangalisayo.

Uthi okwamanje uhulumende ulwisana lokuguqula umnotho welizwe okungenza ukuthi abatsha labanye abantu elizweni bathole imisebenzi.

UMoyo uthi uhulumende ulohlelo lokuguqula umnotho olukhangelelwe ukuletha izithelo ezifunakalayo phakathi kweminyaka emibili kubusa uMongameli Emmerson Mnangagwa.

“Silohlelo lokuthuthukisa umnotho okumele silwenze phakathi kweminyaka emibili. Sesiiqede umnyaka okwamanje, sokusele owodwa ukuthi siluphethe uhlelo lolu. Sibona engani singaqhuba kahle singaphuma kusimo lesi esibi.

“Sokulenguquko ekhona elizweni. Sokulomkambo wokutshintsha imali emabhanga. Sesilemali eyethu esiyisebenzisa eZimbabwe njalo lomkambo ozinzileyo wemali osulenyanga ezimbili.”

UMnangagwa usebhode amazwe amanengi edinga imali yokuvuselela umnotho weZimbabwe. Kukhanya engani kuyasinda ukuvuselela umnotho ngoba lebandla eliphikisayo eleMDC elikhokhelwa nguChamisa lithi uMnangagwa labanye bakhe batshontsha ukhetho nyakenye ngakho ubusa okungekho emthethweni.

Sibusiso Moyo: Abantu Abatshengisela Emigwaqweni Balakho Uhlukuluza Uzulu
please wait

No media source currently available

0:00 0:03:57 0:00

Facebook Forum

XS
SM
MD
LG