amalinks wokungena

Breaking News

Umuyi uSimon Khaya Moyo Unikwa Inhlonipho Yeqhawe Lesizwe


Umuyi uSimon Khaya Moyo.

Owayesikhulumeli sebandla leZANU PF uMnu Simon Khaya Moyo obhubhe ngeSonto ngemva kokukhulelwa ngumkhuhlane wemvukuzane, usephiwe inhlonipho yeqhawe lesizwe (national hero)

Lokhu kwethulwe nguMnu. Obert Mpofu esililweni sika Moyo endlini yakhe eHillside koBulawayo.

“Kubuhlungu kakhulu kuma cdes alapha labanye bethu. Siyaphela sizihambela nje, abanengi kabasaphilanga.”

Ingcitshi ezicubungula ezombusazwe zithi uKhaya Moyo ngomunye wabantu abalwela inkululeko yelizwe okumele ahlonitshwe. Ingcitshi kumbali yeZAPU, uMnu Tjenesani Ntungakwa owayekuZPRA Revolutinary Council, uthi uMoyo liqhawe langempela.

“Imbali kaMnu. Khaya Moyo, ingani inde kodwa imfitshane. Ngo1965 wayeleminyaka engamatshumi amabili lambili. US.K. ngathi ngikhuluma laye watsho ukuba iZAPU yayiqakatheke njani kuye.”

Unobala jikelele we bandla leZAPU, uMnu Mthulisi Hanana, uthi badane kakhulu ngokubhubha kuka Moyo.

“Silusizi bakithi ngokubhubha kuka Khaya Moyo, okokuqala sithanda ukuchasisisa ukuba asifelwanga ngoba ubaba uMoyo sasebenza laye wasesala ku ZANU. Sikhala laye, sasebenza laye enguPA kababa uJoshua Nkomo”

UMnu. Patron Nketa Khutshwekhaya, owasebenza loMoyo, uchasise ngembali yakhe esithi wasiza ilizwe.

“Sasimazi kakhulu kusukela sise kuZAPU. Asibobodwa abeZANU abalahlekelweyo silahlekelwe kakhulu ngoba wayengumuntu owasebenza nzima loMdala uNkomo.”

Kodwa uKhutshwekhaya usole uMoyo esithi ngomunye wabantu ababulala ilizwe ngendlela ababusa ngayo.

“Wayesithi nxa sifuna ukuvusa iZAPU singahluphani laye siye encwabeni lika Nkomo. Kubuhlungu nxa sikucabanga lokhu. Njengomuntu owalwela ilizwe siyazi ukuba waphazamiswa yikudla.”

UMoyo wayelilunga ledale laphezulu leZANU PF njalo waphunyuka ekudonselaneni lokudlephana kubangwa izikhundla kanengi okwakusenzakala kubandla leleli.

Wake waba ngumgcinisihlalo webandla leli ngemva kokukhitshwa kowayengu Mongameli uMnu Robert Mugabe, wetheswa umlandu wokusekela owayengu msekeli kamongameli ngaleso sikhathi uNkosikazi Joice Mujuru

Kusukela ngo2007 kusiya ku2011 uMoyo wayengu mmeli weZimbabwe kwele South Africa.

Wake waba ngumphathintambo wezokukhulumisana ngoMfumfu 2017 ngemva kokuthatha isikhundla lesi kuMnu Christipher Mushowe.

Kuthe ngemva kokhetho luka 2018 wanikezwa umsebenzi wokuba asebenze emahofisini ebandla elibusayo aweZANU PF. Ubeengu mmeli weMatebeleland South edale leSenator.

Ngomnyaka ka 2017 uMoyo nguye owabala incwadi yokuxotshwa kuka Mongameli Emerson Mnangagwa njengomsekeli ka Mongameli Mugabe.

UMoyo waqala ezombusazwe ephansi kwebandla leZAPU ngo mnyaka ka1968 waya fundela ezebutho elizweni le Russia lase Cuba. Ubengomunye wabakubandla leZANU PF abakuluhlu lokufakelwa izijeziso zenotho ngele Melika.

UMoyo ubhubhele esibhedlela seMater Dei, koBulawayo, lapho akade ethwalelwe khona. Ubeseleminyaka engamatshumi ayisikhombisa lasithupha-76 yokuzalwa.

Facebook Forum

XS
SM
MD
LG