amalinks wokungena

Breaking News

Sizoqhubekela Phambili Ngohlelo Lokubhidliza Indawo Ezingekho Emthethweni: Kutsho uHulumende


Mbare Demolitions
Mbare Demolitions

Uhulumende uxwayisa abakhela endaweni ezingekho emthethweni zokuqhuba amabhizimusi ukuba bahle bazibhidlize njengoba abogatsha lwakhe beqhubeka ngomsebenzi wabo wokubhidliza izakhiwo ezingekho emthethweni abawuqale emzini weMbare, eHarare, ngempelaviki edluleyo.

Uhulumende uthi bazoqhubeka bebambisana labomanisipala empini yokususa abathengisela enzikini yedolobho baze baphume baphele eHarare. Lokhu bathi kwenziwa ngenhloso yokufeza uhlelo lokutshiya amadolobho wonke ehlanzekile olwama Clean Cities.

Umphathintambo wedolobha leHarare umnumzana Oliver Chidhawu uchasisele intathelizindaba ngamanyathelo uhulumende asezowathatha ukulungisisa isimo eHarare lakwamanye amadolobho elizweni jikelele.

“Sifuna ukuthi omanisipala banelise ukuthola imali yenzuzo ngokuhlawulisa lezondawo okumele bazihlawulise. Sesilabantu abenza ubugelekeqe beqamba amanga ukuthi basebenzisana labamabandla. Ukuba ngabaqoqekileyo yikho kuphela okungenza sikhange osomabhizimusi bakuleli labakwamanye amazwe ukuzasungula amabhizimusi abo kuleli ukuze lufezeke lolohlelo lokuthuthukisa impilo zabantu lwe VISION 2030.”

Obona ngokuqhutshwa kwenhlelo zentuthuko eHarare umnumzana Tafadzwa Muguti obekulomhlangano laye kugcizelele kulokho.

“ Njengoba sekukhulunyiwe, idolobha leHarare kaliyikudlala ngalabo bantu abathatha izimali ebantwini beqamba amanga ukuthi basebenzisana labebandla le Zanu Pf. Besizithulele nje sonke lesi isikhathi, singakuphenduli lokho obekukhulunywa enkundleni zebulenjini njengohulumende ngoba besifuna ukuba sisebenzisane sizinhlangothi zonke zikahulumende. Siyaqhubekela phambili ngomsebenzi wokubhidliza lezo zakhiwo ezingekho emthethweni sisabalala sisiya kwabanye omanisipala elizweni.”

Kodwa izakhamizi zeHarare ezigoqela umnumzana Victor Dube wasemzini weBudiriro, ziyakusola lokho.

“Indaba le ayikhulumayo kasondaba entsha, sibala amaphepha ngezikhathi ezinengi bekhuluma ngendaba zokuthi hayi, indawo leyana kayilunganga, kumele abantu besuswe khonaphana, babethule. Sokubuya khathesi, uPresident osekhulumile ukuthi hayi, amaBy-Elections sezaba khona, mhla ka 26 ngoMarch lonyaka, sekuyisiphithiphithi ukuthi, hayi asike sizame ukukhipha abantu, sibanike indawo ezinje, sibenzeni, zibenzeni. Khonapho kwenzelwa ukuthi abantu bahlale kuhle yini kumbe bathengise izinto zabo yini, khonokho asikuboni ngoba yinto eke yenziwa. Sisakhumbula thina laphana abantu besuswa njalo ezindaweni onezo, besiyobekwa ngale e-Cocacola, ku Light Industry ukuthi bethengisele khona ngale.”

U-Dube uqhubeke ethi abantu kabali ukuya lapho okumele bayesebenzela khona kodwa into ekhona yikuba kazikho indawo ezanelayo zokusebenzela.

“Nga yikuthi beliplana, ukuthi yinto eyenziwa kudala, ukuthi hayi, abantu sifuna ukuthi bethengisele ezi ndaweni ezinje, lalizakwakha indawo yona leyo lapho elibasa khona, kudala ngabe bekhona khathesi. Khathesi lizafika lenzeni, izulu liyana, bazathengisa njani izinto zabo lapho abamele bathengisele khona izulu linje. Angithi lizafika nje lidwebe nje imizila njengokwenza kwabo, bedweba ukuthi wena ulapha, wena ulapha nje befaka nje okungama number, njengokwenza kwabo. Lokho siyakwazi ukuthi vele nxa sekulento okuthiwa yi-election, kuba lenkinga zonezo.”

Kodwa uhulumende utshele lumhlangano ongenwe yiziphathamandla ezivele kubomanisipala abagoqela owe Chitungwiza, Ruwa, Norton kanye lezasesipholiseni, ukuba injongo yakhe yikulungisisa umonakalo osuthe waba khona emadolobheni ilizwe lonke jikelele.

please wait

No media source currently available

0:00 0:04:55 0:00
XS
SM
MD
LG