Umkhuhlane weCovid-19 usubulele abantu abangamatshumi amabili phakathi kwenyanga eyodwa koBulawayo kulandela ukufa koyedwa kulelidolobho izolo.
I-Harare yona isilenyanga ingelamuntu ngitsho loyedwa ofileyo.
AbakoBulawayo laba babhubhe kusukela mhlaka 10 ngenyanga edluleyo kusiyafika mhlaka 10 kulinyanga, izolo.
Phakathi kwesikhathi esifanayo idolobho lakoBulawayo libe labantu abangamakhulu amabili alamatshumi phose ayisithupha, 256, ababanjwe lumkhuhlane.
Kodwa iHarare yona ilabantu abangamatshumi amahlanu alesitshiyagalolunye, 59, kuphela abafunyanwe belawo.
Inani lasebefile elizweni lonke selokhu umkhuhlane lo waqhamukayo selikumakhulu amabili alamatshumi amahlanu lanhlanu, 255.
Lanxa abezempilakahle besithi bayathokoza ngokwehla kwalumkhuhlane eHarare, bathi bakhathazekile kakhulu ngokwenzakalayo koBulawayo nanku lelidolobho selifikise inyanga likhokhela ngabantu abafayo kanye labahlaselwa yiCoronavirus.
Ababanjwe umkhuhlane lo kuleli njalo izolo bangamatshumi phose amahlanu, 49, abangamatshumi amathathu lambili babo kungabeMatabeleland South.
KulabakoBulawayo abayisikhombisa, abeHarare ababili, abathathu beMasvingo, abane abeMidlands, kanye loyedwa oweMatabeleland North.
Abafunyanwe sebesilile balitshumi lasikhombisa. Asebebanjwe umkhuhlane lo selokhu waqhamukayo kuleli sebengu-8610 kuthi asebepholile bonke sebengu-8040.
Abalokhu begula bangamakhulu amathathu aletshumi lanhlanu, 315 njalo iBulawayo yiyo ehamba phambili ngabantu abangu-94 ilandelwa yiHarare elabangu-69.
Asebebanjwe iCoronavirus emhlabeni jikelele bedlula izigidi ezingamatshumi amahlanu, 51,292,597 kuthi asebefile bedlula isigidi, 1,269,199, ngokutsho kweJohns Hopkins University.