Uhulumende usesungule uhlelo lokuhlaba abantwana abaleminyaka yokuzalwa elitshumi lasithupha kusiya kwelitshumi lasikhombisa, 16-17 years, ijekiseni yeCovid-19.
Ugatsha olubona ngezempilakahle lwethule umbiko izolo lusazisa uzulu ngalelinyathelo njalo luxwayisa, abezikolo, amakolitshi kanye lamanyuvesi ukuthi bahlabise abafundi abaleminyaka le kusukela nje namuhla.
Luthe njalo kuzasetshenziswa ijekiseni elungiswe yinkampani yakweleChina, iSinovac, engenye yamajekiseni asetshenziswayo elizweni ebantwini abadala.
Uhulumende uthi uphakathi kokucubungula ukuthi abantwana abaleminyaka ephansi kwelitshumi lasithupha bengahlatshwa yini labo.
Lanxa sokuhlatshwe abantu abayizigidi ezedlula kancane ezintathu kuphela, 3.3 million, uhulumende uthi ulokhe ekhangelele ukuthi inani leli lifike ku10 million ngoMpalakazi.
Umqondisi wenhlanganiso ephatheke kunhlelo zeCovid-19, iZimbabwe Christian Alliance uMnu Useni Sibanda utshele iStudio 7 ukuthi udaba lkuhlatshwa kwabantwana lungaba yinkinga ngoba abanye abazali belakho ukwala ukuthi abantwababo bahlatshwe.
Kusenjalo, kubhubhe oyedwa ngeCovid-19 eZimbabwe izolo njalo kwatholakala abangamatshumi amathathu belomkhuhlane lo. Asebefile bonke sebesedlula inkulungwane ezine, 4,679.