Annastacia Ndlovu
Abaphathintambo bekhomishini ebona ngezokhetho eyeZimbabwe Electoral Commission (ZEC) ngoLwesibili bebefundisa abantu abazasebenza edale elibhalisa abazancintisa kukhetho ele Nomination Court ukubhalisa amagama alabo abazancintisa kukhetho.
Lokhu kwenzakala ngesikhathi amabandla ezombusazwe aseqalisile ukuhambisa amafomu okubhalisa kukhomishini yeZEC.
Idale leNomination Court liyahlala NgoLwesine. IZEC ithi isilungiselele usuku lolu.
Obona ngezokhetho eZEC koBulawayo, uNkosikazi Sithembile Khuphe, uthi sebezimisele ukubhalisela amagama alabo abafuna ukuncintisa kukhetho oluzayo.
“Umhlaka 14 June sesimlungiselele njalo lamhlanje siphakathi kokufundisa amanomination officers. Lokhe sisamukela amanomonation papers sizaze sivale mhlaka 14 ntambama. Idale leNomination Court lamalunga edale lephalamende liyahlala eTradeold Magistrates Court kuthi eyamakhansila iyahlala eCity Hall.”
UMnu. Mandla Khanye, okhangelele ukuncintisa kuWard 27 emele iZAPU, uthi ngoLwesibili wenelisile ukungenisa amaNomination form akhe.
“Lamuhla ngizongenisa ama nomination form ami ngikhangelele ukuthi lisiyatshona seniqedile.”
UMnu. Xolani Ncube, okhangelele ukubalilunga ledale lephalamende emele iMthwakazi Republic Party elokitshini lePumula, uthi uhlelo luyaphuza lokungenisa amaphepha kodwa bakhangelele ukuqeda ngesikhathi.
“Sizile lapha njengebandla leMRP ukuzongenisa amaphepha ethu lobanje abantu abemukela amaphepha ethu bebalutshwana kodwa sikhangelele ukufeza lamuhla loluhlelo silinde usuku lwenomination court.”
UNkosikazi Kero Rwafa, webandla leZIPP okhangelele ukuncintisa eBulawayo East, uthi amafomu aweNomination Court bawangenise kahle kahlangananga lodubo.
“Mina sengingenisile amaphepha ami enomination angizane ngibe lodubo.”
Omunye njalo owenelise ukungenisa amaphepa akhe kuhle nguNkosazana Esnat Bulayani okhale ngendwendwe ezinde lokuphuza kokwamukelwa kwamaNomination form.
Olunye udubo akhale ngalo yikuthi iZEC yehlulekile ukumupha uluhlu lwababhalisele ukuvota iVoters’ Roll ukuze abelesiqiniseko sokuthi abantu abammelayo babhalisela ukuvota.
“Sesiyenelisile ukungenisa amaphepha ethu lobanje indwendwe zinde bayaphuza njalo sihlalele evalweni ngabantu abasikhethileyo ngoba asazi ukuthi uluhlu lwababhalisele ukuvota lumi njani.”
NgoLwesine kuyonale iviki, mhla ka 14 Nhlangula, idale lokubhalisa lokuhlela abalelungelo lokuncintisa kukhetho lweZimbabwe lwalonyaka, eleNomination Court, liyahlala, amabandla ezombusazwe ekhetha amalunga abo azabamela kukhetho olwenziwa ngoNtulikazi mhla ka 30 lonyaka. Ikhomishini yeZEC isibike ukuba uluhlu lwababhalisele ukuvota iVoters Roll sebelayo njalo wonke ozakwenelisa ukuphutsha kunomination court uzathola ivoters roll kuthi lozulu laye enelise ukuyithenga eZEC.