amalinks wokungena

Breaking News

Sekuzavalwa Ngci eNUST Ngenxa Yokumemetheka Ngamandla Kwegciwane leCOVID-19


Ikolitshi leNational University Science and Technology (NUST) koBulawayo selimisa izifundo zokuya okufundelwa khona ngakho-ke izifundi sokuzamele zenze izifundo zebulenjini ngenxa yokukhuphuka ngamandla kwenani labantu abatholakala bele COVID-19 eZimbabwe.

Inani labantu bonke elizweni abagula umkhuhlane weCOVID-19 ledlula inkulungwane ezingamatshumi (11,908).

UNkosazana Lethokuhle Mlotshwa, ofunda eNUST, uthi batshelwe ukuba sekumiswa izifundo ngenxa yokumemetheka komkhuhlane weCOVID-19.

“Abafundi abanengi esikolo lokhe bebanjwa yiCOVID-19 nxa bengahlolwa ekilinika. Engingakutsho yikuthi vele kungani kule outbreak yophepha esikolo. Namuhla abaphathintambo bekolotshi bebebuza abasimelayo ukuthi bangaki abantu abale flue endaweni zokufundela. Namuhla kukhitshwe umbiko wokuba sesivala, sizafunda online ngoba khathesi vele nxa sihlangene akula social distancing, kulula ukuthi sithelelane.”

Kasenelisanga ukukhuluma leziphathamandla zekolitshi leli ngoba bezingaphenduli omakhalekhukhwini.

UDokotela Munashe Nigel Mudumiso osebenza koBulawayo uthi umkhakha omutsha oweCOVID-19, obizwa ngokuthi yiOmicron, umemethela lula ebantwini.

Lokhu kusekelwa nguMnu. Thembelani Dube, ilunga lenhlanganiso yezakhamuzi eyeBulawayo Progressive Residents Association, othi uhulumende wenze kahle ukuvala ikolitshi leNUST.

Kunani labantu ababanjwe izolo belomkhuhlane weCOVID-19, iHarare iyakhokhela ngabantu abedlula inkulungwane (1,176) kulandele iMashonaland East elabantu abangamakhulu ayisithupha lanye (601), kuthi iMashonaland West ilabantu abangamakhulu amane lamatshumi amabili lasitshiyagalolunye (429), iManicaland iabantu abangamakhulu amane lasitshiyagalolunye (409). EMasvingo kulabantu abedlula amakhulu amathathu lengxenye (356), koBulawayo bangamakhulu amathathu lamatshumi amane lambili (342).

ENkabazwe bangamakhulu amabili phose lamatshumi ayisitshiyagalombili (279). Balutshwana ababanjwa ligciwane leli eMatabeleland South, Matabaleland North leMashonaland Central.

Ababulewe ngumkhuhlane lo bahlanu (5), kuthi abalaliswe ezibhedlela bangamakhulu amabili lamatshumi amabili lasithupha (226).

Umphathintambo kahulumende obona ngezokwethulwa kwemibiko, uNkosikazi Monica Mutsvangwa, ekhuluma izolo ngemva komhlangano wedale labampathintambo eleCabinet, uthe sizafika isikhathi lapho uzulu angasoze evunyelwe ukugada izimoteni ezithwala umphakathi nxa umuntu engazange ahlatshwe ijekiseni yokumelana lobhubhane lweCOVID-19. Wengeze esithi uhulumende uzafaka indawo zokuhlaba ijekiseni ezilindelweni zamabhasi ukuze ofisa ukugada imota aqale ahlatshwe.

Facebook Forum

XS
SM
MD
LG