EleSouth Africa lizaqala namuhla ukwamukela amajekiseni okuvikela umkhuhlane weCovid-19 eliwathenge kunkampani yeAstraZeneca.
Amajekiseni la avela kweleIndia lapho alungiswa khona. Uhulumende uthi kuzaqala ukuhlatshwa abezempilakahle.
Kodwa umphathintambo wezempilakahle uMnu Zweli Mkhize wazise izolo ukuthi izizalwane zakwamanye amazwe, ikakhulu ezingelamaphepha kweleSouth Africa azisoze zihlatshwe.
Le yinto esolwe ngabanengi abathi kuzakubanzima ukuthi umkhuhlane lo uqedwe nxa kutshiywa abanye phandle.
Isiphathamandla senhlanganiso emela izizalwane zakwamanye amazwe eyeAfrica Diaspora Forum uDr. Vusumuzi Sibanda utshele iStudio 7 ukuthi yikuphambanisa okwenziwa yiSouth Africa.
Amazwi kaSibanda agcizelelwe ngumgcinisihlalo wenhlanganiso yeZimbabwe Community in South Africa uMnu Nicholas Ngqabutho Mabhena.