amalinks wokungena

Breaking News

Amalunga Edale Lephalamende Ehluleka Ukususa uJacob Zuma Esikhundleni


Abalandeli baka Mongameli Jacob Zuma bathakazelela impumela yokuvota edale lephalamende.

Amabandla aphikisayo kwele South Africa ehlulekile ukukhipha uMongameli Jacob Zuma esikhundleni ngoLwesibili ekhethweni lokungamethembi oluqhutshwe ngamalunga edale lephalamende.

Kumalunga edale lephalamende edlula amakhulu amathathu (384) avotileyo, edlula ikhulu lamatshumi ayisikhombisa (177) athe akehle esihlalweni kwathi aphose afike amakhulu amabili (198) avotela ukuthi aqhubeke ebusa, abayisitshiyagalolunye bekela ukuvota.

Izizalwane zeZimbabwe kwele South Africa sezitshayele ihlombe amabandla aphikisayo ngesibonelo sawo esihle sokumanyana kulolukhetho lobanje benganqobanga.

Bathi ukumanyana lokhu kufanele kube yisibonelo esikhulu kumabandla aphikisayo eZimbabwe, osekuleminyaka ezama ukukhupha umongameli Mugabe esihlalweni kodwa esehluleka. UBenedict Nhlapho usipha loludaba eseJohannesburg kweleSouth Africa.

Abebefuna uZuma aphume bebesithi ulenkohlakalo, useyehlulekile ukubusa, usebulele umnotho welizwe, besithi njalo usethengise ilizwe kumuli yase India enothileyo eyakoGupta. Ngemva kwali mpikiswano amalunga edale lephalamende aqhube ukhetho lwensitha ukuze kungabi khona okwaziyo ukuthi umuntu uvotele ukuthi uZuma aphume kumbe hatshi.

Umkhokheli webandla le United Democratic Movement, uMnumnzana Bantu Holomisa, unxuse lamalunga eANC angasamfuniyo uZuma ukuthi lawo avotele ukuthi akhitshwe njengoba kungelamuntu ozakwazi ukuthi bavotele lokho.

Isikhulumeli sebandla le Progressive Democrats of Zimbabwe, uMnu. Mpiyezwe Nare, uthi leyinto okufanele yenziwe laseZimbabwe.

“Kuyinto enhle kakhulu ukuba amabandla aphikisanayo evumelane ingoma enye, okuyinto esiyifisayo lathi ukuba njengama opposition parties aseZimbabwe, nga siyafunda kuloluhlangothi lweSouth Africa sibone ukuthi benza njani and impumela yakhona imikanjani.”

Kodwa abe ANC labo bebefunga ngendololwane besithi umongameli Zuma akayindawo. Ilunga lebandla le ANC uNkosazana Nomvula Mokonyane utshele abasekeli baleli bandla abebezosekela umongameli Zuma ukuthi akayindawo.

Isikhulumeli sebandla le PAMU eleZimbabwe, uMnumnzana Cosmas Ncube, uthi usizi yikuthi eZimbabwe awekho amabandla aphikisayo ayaziyo into ayenzayo.

“Yes abantu be South Africa bayayimela into yabo. Kithi eZimbabwe ayikho i opposition. I opposition ekhona ayifaki amademands kuZanu pf, that’s why i Zanu pf izenzela ngoba akukho okufakwa etafuleni yi opposition okuyidemand.”

Isizalwane seZimbabwe, uMnumnzana Khulumani Njayi, uthi ngokwenza lokhu iSouth Africa itshengise isibonelo esihle kakhulu kuzwekazi lonke le Africa.

“Izwekazi le Africa lona lizoba lesibonelo esihle nxa kungenzakala into enje eSouth Africa. Amazwe amanengi e Africa angaba le confidence yokuba idemocracy ayisaphendukeli emuva ayisajikeli emuva isisiyaphambili. Labo bangasithatha njengesibonelo esihle sokubana belungisise imbuso yabo emazweni abo ahlukeneyo ngendlela efanayo.”

Nxa umongameli ekhitshwe ngokhetho olufana lalolu, kufanele yena labaphathintambo bakhe behle esihlalweni, uSomlomo abengumongameli okwenyanga, bese kukhethwa omunye umongameli ephalamende.

Facebook Forum

XS
SM
MD
LG