Umqondisi wogatsha lwendaba zasekhaya kweleSouth Africa, uMnu. Mkuseli Apleni, usengezelele isikhathi sabe Zimbabwe abafuna ukufaka izicelo zamapermit ohlobo lwe Zimbabwean Exemption Permit.
UApleni utshele intathelizindaba ePretoria ngoLwesihlanu ukuthi lohluhlelo seluzavalwa mhlaka 31 Zibandlela 2018 ukwenzela ukuqeda ukuminyana obesekukhona emahofisini okufaka izicelo zala mapermit.
Uhlelo lokufaka izicelo zamapermit ohlobo lwe Zimbabwean Exemption Permits (ZEP) beseluthwalise nzima kakhulu izizalwane zeZimbabwe. Besekutholakala izinkulungwane emzileni kukanti abanye bebelinda ukuthola usizo kusukela liphuma kusekuyatshaya ihola letshumi abusuku, bebuyele belengise izandla.
Isizalwane seZimbabwe uMnumnzana Jaconia Khulambone uthi inhlupho ezibhekane laloluhlelo sezibatshiye besesabela ukuthi ngeke baphumelele.
“Mina bathe ngingene ngo 4, kodwa still abaka 2 Oclock izolo baqala ukungena bona akulanto ehambayo kahle. Mina kuzobanzima ukuthi ngicele futhi kusasa. Lamhlanje kumele kuphelele lapha lamhla. Kusasake kuzoba nzima kimina ukuthi ngizothini? Ngiyecela futhi? Cha! Ngeke ngikwenze lokho. Akulanto ehamba kahlela.”
Leyinto egcizelelwa ngumgcinisihlalo weZimbabwe Community in South Africa uMnumnzana Ngqabutho Mabhena.
“Bakhona abanye akade sikhuluma labo akade bele appointment eka 10.30am. So yizo izinto lezi esibona ukuthi azihambi kuhle esicabanga ukuthi uDirector General kumele azazi. Abantu bayadiza amasecurity. Umuntu owavele wabhuka ngo 9 O’clock uyabuya lapha ngo 6 kumbe umuntu obhukhe ngo 2 uyabuya ngo 9 O’clock. Afunu kungena phakathi kodwa isikhathi sakhe singi 2 o’clock.”
Kodwake ekhuluma labezindaba ePretoria, uApleni uthe ugatsha lwakhe seluthetha amanyathelo okwenqabela loluhlupho.
UApleni uthe lokhu kuminyana besekubangelwa yikuthi inkampani yeVFS ibizama ukuqeda loluhlelo ngesikhathi esabekwayo mhlaka 31 Mpalakazi kungakho sebengezelele isikhathi sokufakwa kwezicelo saya mhlaka 31 Zibandlela 2018.
“Sithe masibonake ngokhu amanani esinawo, sabonu ukuba heyi asizukukwazi ukubanika ithuba elaneleyo. So ke lamhlanjeke besicasisa ukuba lalo okaDecember simyusile, iyakuma ngo January so ithethu kuba abantu baseZimbabwe uDecember loJanuary, mabamsebenzisele ukuba beyokwenza lezi i-appointments.”
UApleni uthi uhlelo lukufaka izicelo ebulenjini be internet lona luzavalwa ekupheleni kwayonale inyanga besekusala lolu olukuya emahofisini eVFS. Uthi loluhlelo luhamba kuhle kakhulu lobanje kulenhlupho ezibhekana lalo ezigoqela lokungahambi kuhle ehlelweni lokufaka izicelo ebulenjini be internet.
Phakathi kwezizalwane zeZimbabwe ezingu 197 941 ezilelungelo lokufaka izicelo zama ZEP, ezingu 169 078 sezifakile izicelo ebulenjini be internet, kuthi ezingu 135 913 seziphiwe ilanga lokuzoziveza emahofisini eVFS kantike ezingu 72 612 seziqedile zonke izigaba zokufaka izicelo zokuthola amapermit la.
UApleni ukhuthaza izizalwane zeZimbabwe ukuthi zingayi emahofisini eVFS nxa usuku lokuyaziveza lungakafiki, ukuze kwenqatshelwe ukuminyana kulezi indawo.
