amalinks wokungena

Breaking News

Ibandla leANC eSouth Africa Selizaqalisa Ukuhluthunela Abamhlophe Umhlabathi Njengalokho Okwenzakala eZimbabwe


Abantu abasemhlanganweni webandla leAfrican National Congress ababike ukuthi sokuzathathwa umhlabathi kungelanhlawulo.

Ibandla elibusayo kwele South Africa eleAfrican National Congress (ANC) selikhuthaze uhulumende ukuthi aqale ukuthatha amapulazi kwabamhlophe kungelanhlawulo.

Lesi yisivumelwano esenziwe ngamalunga alelibandla emhlanganweni wokukhuluma ngomhlaba kwele South Africa oqutshwe ngempelaviki eJohannesburg.

Ngokufisa kwamalunga ebandla leANC, kufanele kuthi kusiyaphela linyanga uhulumende eseqalile ukuthatha amapulazi kwabamhlophe lakumankampani alomhlaba kumbe amapulazi amanengi ezandleni zabo.

Ekhuluma labezindaba ngoMvulo eJohannesburg umongameli weSouth Africa, uMnu. Cyril Ramaphosa, uthe amalunga ebandla lakhe avumelene emhlanganweni zezemihlaba oqhutshwe ngemepalaviki ukuthi labo abalomhlaba omnengi abathathelwe wabelwe abensundu.

“Kufanele sisombulule udaba lokwabiwa komhlaba sibuyisele umhlaba ebantwini owathathwa kubo. Lokhuke kufanele kukhokhelele ekuthini umhlaba uthathwe nguhulumende kungelanhlawulo. Lokhu kuzakwenza ukuthi kube lokudla okwaneleyo elizweni kuphinde kuthuthukise umnotho welizwe.”

UMongameli Cyril Ramaphosa
UMongameli Cyril Ramaphosa

UMnu. Ramaphosa uthi kusobala ukuthi ilizwe lakhe lingeke libuqede ubuyanga olubhekane labantu abamyama nxa bengaphiwanga umhlaba wokulima, ukwakha izindlu lokuqhubela inhlelo ezitshiyeneyo zamabhizimusi.

Ngesikhathi sombuso woncindezelo kweleSouth Africa, abensundu bathathelwa umhlaba ovundileyo waphiwa abamhlophe bona baxotshelwa endaweni ezilugwadule. Enyangeni ezisanda kwedlula iphalamende yakweleSouth Africa yavotela ukuthi kuguqulwe isisekelo sombuso ukuze abalomhlaba omnengi bawuthathelwe kungelanhlawulo.

Kodwa-ke isiphathamandla sekomiti enkulu ebandleni le ANC, uMnu. Ronald Lamola, utshele abezindaba ngoMvulo ukuthi bafuna ukuthathwa kwamapulazi lawo kuqale khathesi loba lowo mthetho ungakethulwa njengoba bakhona abathi le yinto evunyelweyo kusisekelo sombuso esikhona manje.

“Kufanele sisebenzise umthetho okumugca wamatshumi amabili lanhlanu kusisekelo sombuso ukuthatha umhlaba kungelanhlawulo. Iphalamende kufanele ngokuphangisa ipasise umthetho wokuthathwa komhlaba, kube ngumthetho ogcazayo ukuthi ngumhlaba onjani okufanele uthathwe nguhulumende. Kufanele njalo kumiswe konke ukuxotshwe kwabansundu abahlala emapulazini abebesebenza kuwo.”

Kodwa-ke inengi lezizalwane zithi kunengi uhulumende weSouth Africa okuzafuze akuqaphele engakethuli loluhlelo ukuze umnotho welizwe ungacini ulala ngogedla njengalokhu okwenzeka eZimbabwe. Bakhona abathi kufanele kufundiswe ezokulima kuqala kubalimi abazathatha amapulazi ukuze aqubeke ethola isivuno.

Umhlangano webandla leAfrican National Congress beliceciswe ngemifanekiso kamuyi uNelson Mandela
Umhlangano webandla leAfrican National Congress beliceciswe ngemifanekiso kamuyi uNelson Mandela

Abanye bathi kufanele kube lemali ezaphathisa abalimi abatsha ukuthola inhlanyelo, amathalakitha, umvundiso, kanye leminye imitshina yesimanjemenje kwezokulima.

Kulesixwayiso njalo sokuthi kuqatshelwe umhlaba lo ungayi wonke ezandleni zabalutshwana abalemali lezikhundla kuhulumende.

Lobanje sekulezehlakalo ezinengi zabantu abangena ngodli endaweni ezingelabantu labatshengisela befuna umhlabathi kwele South Africa unobhala jikelele webandla le Zimbabwe Communist Party, uMnu. Ngqabutho Mabhena, uthi kulezibonelo zokuthi uhlelo lweSouth Africa lolu alusoke lufane lolweZimbabwe.

“Asizoze sibone abantu bengena emapulazini njengalokhu okwenzakala eZimbabwe ngoba yonke into yenzakala ngaphansi komthetho weSouth Africa. EZimbabwe kwakungekho ngaphansi komthetho ngoba isisekelo sombuso okwakufanele siphasiswe sehluleka ukuphasiswa ngoFebruary walowomnyaka.”

Ikhomiti enkulu yebandla leANC ikhangelelwe ukuqhuba umhlangano wayo ngeviki elizayo lapho okukhangelelwe ukuthi ithathe isinqumo sokucina ngaloludaba.

Facebook Forum

XS
SM
MD
LG