Inkomo ziqhubekela phambili zisifa ngenxa yokuswela utshani lamanzi okwenza abanye abalimi bacine bethenga ukudla kwenkomo loba inengi labo lisithi kuyadula kakhulu ukudla lokhu.
USobhuku weGandangula Village, uMnu. Norman Elvis Sibanda Maponya, uthi izifuyo zibhekana lendlala embi.
''Isimo sezifuyo simi kubi kakhulu akulamanzi akulakudla, akulangitsho, siswele lomcendisi. lezilimo zethu zatsha njengoba lawe ukhangele.''
UKhansila kaWard 19, uMnu. Thabani Dube, uthi bakhangelele ukuthola ukudla kwenkomo okumele kuholiswe nguhulumende kumbe okutholakala kunhlanganiso ezizimele zodwa.
''Izifuyo ziyalamba kakhulu. Sikhangelele ukuthi laba abakade besincedisa ngestockfeed ngabe bayaqhubekela phambili ngoba ngesimo esibhekane laso singalahlekelwa zinkomo ezinengi kakhulu.''
lsakhamuzi seGandangula, uMnu. Methuseli Moyo, uthi ufelwe zinkomo ezinhlanu njalo kulez’insuku inkomo azithengiseki ngenxa yokuthi zicakile njalo labantu bayalamba.
''Lapha sithwelenzima ngendlala. Sidla kanye ngelanga njengenja. Mama ngithwele nzima ngafewa zinkomo ezinhlanu. Eziseleyo zicakile. Abanye sebezithenga nge$550 Zimbabwe dollars abayifaka efonini. Sithwele nzima ngoba kayiphumi efonini imali leyo. Ngilomzukulu ofuna imali yesikolo kodwa kayiphumi efonini.''
UMnu Petros Dube, ofelwe zinkomo ezilitshumi lanye, ukhala ngokuthi eziseleyo sezitshengisa ukucuba.
''Uhlupho lwami engihlangana lalo ngolwezifuyo zisifa amalanga elandelana. Izifuyo eziseleyo lazo sicakile angiboni zizaphutsha lumnyaka. Zicakile, ziyavuswa. Singazi lokuthi istockfeed izakubakhona njalo lemali yokuthenga istockfeed ayikho kunzima.''
Izakhamizi zeLupane zichaze ukuba bezithola ukudla kwenkomo ngaphansi kwenhlanganiso ezizimeleyo bethenga isaka lokudla kwenkomo elilodwa ngamatshumi amathathu amadola kodwa kulez’insuku akusekho. Inkomo sezicuba.
