Ibandla leMovement for Democratic Change (MDC-T), elikhokhelwa nguMnu. Douglas Mwonzora, selixotshise edale lephalamende uNkosikazi Thokozani Khupe lisithi usephumile kubandla leli.
Kodwa uMaKhupe uthi lokhu kwenziwe kuye ngoba ungumuntu wesifazana.
UMaKhupe utshele intathelizindaba eHarare ukuba usexotshiwe ephalamnde nguMnu. Mwonzora esithi uyamangala ukuba idale lephalamende likhethe njani icele elilodwa le MDC-T elikhokhelwa nguMwonzora.
Lokhu kuza ngesikhathi uMaKhupe esephume ebandleni leli esithi laye uxotshe uMwonzora kulandela athi yikungahloniphi kwakhe isisekelo sombuso webandla leli.
UMaKhupe uthi uMwonzora wazixotshisa kubandla leMDC-T ngoba watshela iZimbabwe Electoral Commussion ukuba usekhokhela umanyano weMDC Alliance, owawulibandla elakhokhelwa nguMnu. Nelson Chamisa osebumbe eleCitizens Coalition for Change.
UMaKhupe uthi ngesikhathi ibandla leli lidabuka phakathi ngo2005, iphalamende ayizange ikhethe cele ngakho-ke kuyamangalisa ukuba kuyini okwenze uMwonzora waphiwa imvumo yokumxotsha.
Uthi ubona engani lokhu kwenziwe ngoba yena engumuntu ongumama.
“Lokhu ngikubona njengokuhlukuluzwa kwami ngenxa yokuthi ngingumuntu ongumama. Lokhu ngizakusa edale lomthethwandaba. Obaba bayabalalela ngithemba lami bazangilalela.”
Uthi uselobele inhlanganiso ezilwela amalungelo oluntu ukuba zicubungule ukuba kungani omama bekhangelelwa phansi kwezombusazwe.
Kodwa uMnu. Witness Dube, isikhulumeli secele leMDC-T ekhokhelwa nguMwonzora, uthi akusiqiniso okukhulunywa nguMaKhupe.
Uthi uMaKhupe waphuma yedwa ebandleni leli ngemva kombiko awukhipha ko Bulawayo esithi usexotshe uMwonzora.
“UMaKhupe uzokhele amalahle ekhanda. Uzzenzi kakhalelwa kukhalelwa umenziwa. Awusoke ungumkhokheli ulove emhlanganweni njalo uhambe kubononzindaba uzikhulumele wedwa ukuba usuxotshe umkhokheli okhethwa ngabantu.”
Kodwa uMnu. Ntando Ndlovu, isikhulumeli sika MaKhupe uthi iphalamende kumele imkhangele njengomuntu okhokhela ibandla elizimeleyo.
“… Uthi kasoze avume ukuba abantu besifazana behlukunyezwe esithi uzakulwa kuze kufike emaphethelweni.”
Ingcitshi kwezombuzwe, uMnu. Mlungisi Dube, uthi kumele uMaKhupe loMwonzora bakhumisane umlotha.
“Kumele bekhumisane umlotha ngoba akula ngenye indlela ibandla leMDC elizasukuma nxa behlala besilwa besezenje. Kuqakathekile ukuba babe lokukhulumisana umlotha ukuze bezwanane kulokho abakwenzayo.”
Yehlule imizamo yokuthola imibono kasomlomo wedale lephalamende, uMnu. Jacob Mudenda, okade engaphenduli umakhalekhukhwini wakhe.